മിന്നിത്തിളങ്ങും നക്ഷത്രക്കൂട്ടം

മുൻവർഷങ്ങളിലെല്ലാം ശ്രദ്ധേയമായ സിനിമകളുടെ പേരിൽ ക്രിസ്തുമസ് സ്റ്റാർ പുറത്തിറങ്ങുക പതിവാണ്

- ജി. കൃഷ്ണൻ

ക്രിസ്തുമസ്കാലമായി കഴിഞ്ഞാൽ കോട്ടയത്ത് കഞ്ഞിക്കുഴിയിൽ നക്ഷത്രദീപങ്ങൾ തെളിയുന്ന കാഴ്ച നോക്കിനിന്ന് ആസ്വദിക്കാൻ ആളുകളുണ്ട്.

കുറെ നക്ഷത്രങ്ങളുടെ കൂട്ടാം...

മിന്നിത്തിളങ്ങുന്നതും മിന്നിമറയുന്നതുമായ നക്ഷത്രക്കൂടാരങ്ങൾ.

ക്രിസ്തുമസ്സിന്റെ മാസമായ ഡിസംബർ ഒന്ന് പിറവിയെടുക്കുന്നതോടെ ഇവിടം വർണ്ണങ്ങളാൽ അലകൃതമാകുന്നു. ആ വർണ്ണപ്പകിട്ടുകളുടെ ഉറവിടം "പിങ്കിയാണ്. "പിങ്കി എന്നാൽ ക്രിസ്തുമസ് ഷോപ്പിംഗിന്റെ സംതൃപ്തിയേകുന്ന വാക്കാണ്.

മഞ്ഞുകണങ്ങളും തണുപ്പും കുളിരും നിറഞ്ഞ ക്രിസ്തുമസ്കാല രാവുകളിൽ നക്ഷത്രദീപങ്ങൾ തെളിയുന്നതിനും ക്രിസ്തുമസ് ഒരുക്കുന്നതിലും ക്രിസ്തുമസപ്പയും ബലൂണുകളും അലങ്കാരങ്ങളുമൊക്കെ റെഡിയായി വരുന്നതിനും പ്രത്യേക തയ്യാറെടുപ്പുകൾ വേണം.

ക്രിസ്തുമസ് വിപണി സജീവമാകുന്നതിനെക്കുറിച്ച് ചോദിക്കുമ്പോൾ മിനി ഫിലിപ്പ് പറഞ്ഞു.

ഡിസംബർ 25 നാണ് ക്രിസ്തുമസ്സെങ്കിലും സ്റ്റാറും ഡെക്കറേഷൻ മെറ്റീരിയൽസുമെല്ലാം ഞങ്ങൾ രണ്ട് മൂന്ന് മാസം മുൻപുതന്നെ ഓർഡർ കൊടുക്കും. ഞങ്ങളത് ഷോപ്പിൽ ഡിസ്പ്ലേ ചെയ്യുന്നത് ഡിസംബർ 1-ാം തീയതിയോടുകൂടി ആയിരിക്കുമെന്ന് മാത്രം.

ഡിസംബർ മാസത്തിന്റെ തുടക്കത്തിൽ വിദേശ മലയാളികളുടെ വരവാണ് കൂടുതലുണ്ടാകുന്നത്. പേപ്പർസ്റ്റാറുമൊക്കെ അവർ ബൾക്കായി വാങ്ങി ക്കൊണ്ടുപോകും. വിദേശത്തുള്ള റിലേറ്റീവ്സിനും ഫ്രണ്ട്സിനുമൊക്കെ അവർ ഈ പേപ്പർസ്റ്റാർ ഗിഫ്റ്റായി കൊടുക്കും. നമ്മുടെ ഇവിടെ ഇത്രയും ക്വാളിറ്റിയിൽ കിട്ടുന്നതുപോലെ ഗൾഫിൽ ഇത് കിട്ടില്ലെന്നാണ് അവർ പറയാറുള്ളത്. നമ്മുടെ ഇവിടുത്തെ സ്റ്റാറുകൾ അവർക്ക് വളരെ പ്രിയങ്കരമാണ്. പേപ്പർസ്റ്റാറും എൽ.ഇ.ഡി സ്റ്റാറുമാണ് ഇക്കൂട്ടർ ധാരാളമായി വാങ്ങുന്നത്.