கௌரி லங்கேஷ்...நீதிக்கு நிகழ்ந்த அநீதி!

அது 2017 ஆம் ஆண்டு செப்டம்பர் 5 ஆம் நாள் இரவு எட்டு மணி. பெங்களூரைச் சேர்ந்த அந்த 55 வயது பெண்மணி, வழக்கம்போல தன் வீட்டுக்கு திரும்பிய போது, அடையாளம் தெரியாத மர்ம நபர்களால், ஏழு முறை சுடப்பட, அதில் கழுத்து, மார்பு, வயிறு என்று மூன்று இடங்களில் குண்டு பாய்ந்து சம்பவ இடத்திலேயே அநியாயமாக இறந்து போனார்.

- ரம்யா ரவிக்குமார்

அவ்வாறு கொடூரமான முறையில் கொல்லப்படுவதற்கு அந்தப் பெண்மணி செய்த ஒரே தவறு, இந்துத்துவா மதவெறியை தன்னால் முடிந்தவரை தீவிரமாக எதிர்த்தது. அவர் பெயர் கெளரி லங்கேஷ். பெங்களூரில் சொந்தமாக பத்திரிகை நடத்தி வந்த பெண் போராளி, இலக்கியவாதி மற்றும் பத்திரிகையாளர்.

1962 இல் பெங்களூரில் பிறந்த கெளரி, 1980 இல் ஒரு ஆங்கில ஊடகத்தில் தன்னுடைய பத்திரிகையாளர் பணியைத் தொடங்கினார். 2000 ஆவது ஆண்டு பத்திரிகையாளரும், கவிஞருமான அவருடைய தந்தை லங்கேஷின் மறைவுக்குப் பெங்களூரில் பணியாற்றி வந்தார். அப்போது தான், கௌரி ''பத்திரிகா' என்றொரு பத்திரிகை நிறுவனத்தைச் சொந்தமாகத் தொடங்கி, எந்த ஒரு விளம்பரமும் இல்லாமல் வாசகர் கட்டணத்தை வைத்தே அதை வெற்றிகரமாக நடத்திக் காட்டினார்.

கெளரி தொடக்கம் முதலே இடதுசாரி சிந்தனை கொண்டவர். அவர் நினைத்திருந்தால், ஒரு வசதியான வளமான வாழ்வை வாழ்ந்திருக்க முடியும். ஆனால், அவர் தன் தந்தையின் வழியைப் பின்பற்றி, அநீதிக்கு எதிராக போராடும், முற்கள் நிறைந்த கடினமான பாதையைத் தேர்ந்தெடுத்தார்.  தவறு செய்வது நாட்டின் பிரதமரே ஆனாலும், தயக்கமே இன்றி தட்டிக் கேட்ட கௌரி, கட்சி பாகுபாடின்றி கண் முன்னால் நடக்கும் அநியாயங்களை, தன் பேனாவின் கூர்முனையால் குத்திக் கிழித்தார்.

" மதவெறி என்பது ஒரு போதை மருந்தைப் போல எப்படி மக்களின் மனதில் விதைக்கப்படுகிறது என்பதை அறிந்து கொள்ள. தனக்கு யார் என்றே தெரியாத ஒரு பெண்ணை கொலை செய்யும் அளவிற்கு மதத்தின் பெயரால் அவர்களின் மூளை மழுங்கடிப்படுகிறது. இன்னும் கூறப்போனால், மதவெறி என்பது இரத்தத்தில் கலந்த நஞ்சு. அது ஒருநாள் கொண்டவரையே அழிக்கும்"