Disney PRINCESS

റിസ്വാൻ മുറി തുറക്കുന സ്വാഗതം ചെയ്യുന്നത് 1300 ഡിസ്നി പാവകൾ. വിപണി മൂല്യം ഒരു കോടി. ഒരു മോഹത്തിന്റെ ഗിന്നസ് റെക്കോഡിലേക്കുള്ള യാത്രയുടെ കഥ

- രൂപാ ദയാബ്ജി

ഏഴു വയസ്സുള്ള കുഞ്ഞു റിസ്വാനയ്ക്ക് ഉറങ്ങണമെങ്കിൽ സിൻഡ്രല്ല കഥ കേൾക്കണം. ആ കഥയോടുള്ള ഇഷ്ടം കൊണ്ട് അവളൊരു സ്വപ്നം കണ്ടു. ഒരു മുറി നിറച്ച് ഡിസ്നി പാവകൾ. അതിനിടയിൽ സിൻഡ്രല്ല രാജകുമാരിയെ പോലെ അവൾ ഡിസ്നി കാർട്ടൂൺ പാവകളെ ജീവനായി സ്നേഹിച്ച റിസ്വാന ഗോറിയുടെ പേരിലാണ് ഇന്ന് ഏറ്റവുമധികം ഡിസ്നി പ്ലഷ് ടോയ്‌സ്  കൈവശമുള്ള ഇന്ത്യാക്കാരി എന്ന റെക്കോർഡ്.

ഡിസ്നി പ്ലഷ് ടോയ്‌സ് കളക്ഷൻ ഹോബിയാക്കിയിട്ട് 23 വർഷമെത്തുമ്പോൾ റിസ്വാനയുടെ മുറിയിലുള്ളത് 1300ലധികം ഒറിജിനൽ ഡിസ്നി പാവകളാണ്. അവയ്ക്ക് ഒരു കോടി രൂപ വിലമതിക്കും. ഗിന്നസ് ലോക റെക്കോർഡ് ലക്ഷ്യമാക്കിയുള്ള റിസ്വാനയുടെ യാത്ര അറിയാം.

സിൻഡ്രല്ലയും കൂട്ടുകാരും

 “സിൻഡ്രല്ലയോടുള്ള എന്റെ ഇഷ്ടമറിഞ്ഞ് ആദ്യമായി പാവ സമ്മാനിച്ചത് അബ്ബയാണ്. ദുഷ്ടയായ രണ്ടാനമ്മ, അവരുടെ മക്കൾ... അവയൊക്കെ ചേർത്തുവച്ച് സ്വയം കഥ മെനയും. അബ്ബ റസാഖ് ഖാൻ ഗോറി അന്ന് ഷാർജയിലെ ഓറിയന്റ് ടൂർസ് ആൻഡ് ട്രാവൽസ് സിഇഒ ആയി ജോലി ചെയ്യുകയാണ്. ജോലി ആവ ശ്യത്തിനായി അബ്ബ പല രാജ്യങ്ങളിലും യാത്ര ചെയ്യണം. വരുമ്പോൾ എന്താ വേണ്ടത്' എന്ന് അബ്ബ ചോദിക്കും. ചോക്ലേറ്റും ഗെയിമുകളുമാകും അനിയന്റെ ലിസ്റ്റിൽ ഞാൻ ഡിസ്നി ടോയ്സിന്റെ പേര് എഴുതി കൊടുത്തുവിടും. വരുമ്പോൾ അബ്ബയുടെ പെട്ടിയിൽ ആ ടോയ് ഉണ്ടാകും.

ഹോബിക്കായി ജോലി