അമ്മ എന്ന അഭയതീരം

 വേളാങ്കണ്ണി മാതാവിന്റെ ദർശനപുണ്യം തേടി കെഎസ്ആർടിസിയുടെ സൂപ്പർസ്റ്റാർ പച്ച ബസ്സിനൊപ്പം യാത്ര...

- വിജീഷ് ഗോപിനാഥ്

ചങ്ങനാശേരി. ഉച്ചയ്ക്ക് രണ്ടു മണി കഴിഞ്ഞു പത്തു മിനിറ്റ്. യൂണിഫോമിട്ട് അച്ചടക്കത്തോടെ ഇരിക്കുന്ന ക്ലാസ്സ്  മുറിയിലേക്കു കളറുടുപ്പിട്ട് കുട്ടി കയറിച്ചെല്ലുന്നതു പോലെയായിരുന്നു ആ വരവ്. ചുവപ്പും മഞ്ഞയും നിറമുള്ള ബസുകൾക്കിടയിലേക്കു പച്ചക്കുപ്പായമിട്ട വേളാങ്കണ്ണി സൂപ്പർ എക്സ്പ്രസ് പാഞ്ഞു വന്നു കുലുങ്ങി നിന്നു.

പെട്ടെന്നൊരു പയ്യൻ ബസിന്റെ മുന്നിലെത്തി മൊബൈലെടുത്തു ബസിനെയും ചേർത്തു പിടിച്ചൊരു പടം പിടിച്ചു. “കെ കണക്കിനു ലൈക്ക് കിട്ടാനുള്ള സെൽഫിയാണത്.

സ്റ്റാൻഡ് പിടിച്ച ബസിനെക്കുറിച്ച് അത്ര പരിചയമില്ലാത്തവർക്കായി ചങ്ങനാശേരിയിൽ നിന്നു വേളാങ്കണ്ണിക്കുള്ള  സൂപ്പർ എക്സ്പ്രസ് എയർ ബസ്സാണിത്. ചുവപ്പും വെള്ളയും ഓറഞ്ചും കുപ്പായമിട്ട ആനവണ്ടികൾക്കിടയിൽ ഫുൾ ടാങ്ക് നൊസ്റ്റാൾജിയയും നിറച്ചോടുന്ന അപൂർവം പച്ച ബസ്സുകളിലൊന്ന്. കേരളത്തിന്റെ നിരത്തുകളിൽ നിന്നു "ഹരിത നിറമുള്ള വണ്ടികൾ മാഞ്ഞു തുടങ്ങിയെങ്കിലും ഈ ബസ് പാഞ്ഞുകൊണ്ടേയിരിക്കുന്നു. റോഡിൽ മാത്രമല്ല, സോഷ്യൽ മീഡിയയിലും

 മാസങ്ങൾക്കു മുൻപ് ഈ ബസിനെ ഇറക്കിവിട്ടു പകരം പുതിയ വണ്ടിയിറക്കാൻ കെഎസ്ആർടിസി തീരുമാനിച്ചു. ആരാധകർ അടങ്ങിയിരിക്കുമോ? സോഷ്യൽമീഡിയയിൽ പ്രതിഷേധം ടോപ് ഗിയറിലായി. ഒടുവിൽ ഈ ബസ് പിന്നെയും ഓടിത്തുടങ്ങി. "പച്ചനിറമുള്ള ആനവണ്ടി'യുടെ സാരഥി സന്തോഷിന്റെ സന്തോഷ് കുട്ടൻസ്' എന്ന ഫെയ്സ്ബുക് പേജ്  എടുത്തു നോക്കിയാൽ മതി, റീൽസായും പോസ്റ്റായും ബസ് ഓടുന്നതു ലൈക്കടിച്ചും കാണാം. ഒപ്പം കമന്റിട്ടും കയ്യടിക്കുന്ന ആരാധകരെയും.

അനൗൺസ്മെന്റ് മുഴങ്ങി കോട്ടയം, അങ്കമാലി, തൃശൂർ, പാലക്കാട് വഴി വേളാങ്കണ്ണിക്കുള്ള സൂപ്പർ എക്സ്പസ് എയർബസ് സ്റ്റാൻഡിന്റെ മധ്യഭാഗത്തു പാർക്ക് ചെയ്തിരിക്കുന്നു.

സമയം രണ്ടു മുപ്പത്. ഡോറടഞ്ഞു, അഭയം തേടിയുള്ള യാത്ര തുടങ്ങുകയാണ്. ആരാധനയോടെ ലക്ഷങ്ങളെത്തുന്ന മണ്ണിലേക്ക്. സങ്കടങ്ങൾ ഉരുകിയലിയുന്ന വേളാങ്കണ്ണിയിലേക്ക്...

പകുതിയിലേറെ സീറ്റും നിറഞ്ഞു. ജനാലയിലെ ഗ്ലാസ് നീക്കി വച്ചു. അകത്തേക്കു വരണ്ട കാറ്റടിച്ചു കയറി. കണ്ണടച്ചപ്പോൾ ഉള്ളിൽ നിറഞ്ഞത് മാതാവിന്റെ കരുണ തുളുമ്പുന്ന മുഖം. ദുരിതക്കടലിൽ അലയുന്ന എല്ലാവർക്കും അഭയ തീരമാകുന്ന അമ്മ.

പ്രാർഥനാ ഭരിതം, യാത്ര