ഭാർഗവിക്കുട്ടി വന്നപ്പോൾ

ഭാർഗവിനിലയത്തിലെ നായകനെ കാണാൻ നിലവെളിച്ചത്തിലെ നായിക എത്തിയപ്പോൾ...

- വിജീഷ് ഗോപിനാഥ്

അഭിനയത്തിന്റെ ഹിമാലയത്തിനു മുന്നിലേക്കാണു യാത്ര. മലയാളിക്കു സിനിമയുടെ മധുരം നുള്ളിത്തന്ന മധുവിന്റെ അരികിലേക്ക് വെള്ളിത്തിരയിൽ രണ്ടു കാലങ്ങളിൽ യാത്ര ചെയ്തവരുടെ സമാഗമം കൂടിയാണിത്.

മധു നായകനായ ഭാർഗവീനിലയ'ത്തിൽ നിന്നാണു റിമ നായികയായ 'നീലവെളിച്ചം' പിറക്കുന്നത്. ആദ്യ സിനിമയിലെ നായകനെ കാണാൻ റീമേക്ക് സിനിമയിലെ നായികയെത്തുന്നു, ഒരുപക്ഷേ, ഇങ്ങനെയൊരു ഒത്തു ചേരൽ അപൂർവം.

തിരുവനന്തപുരം കണ്ണമ്മൂലയിലെ ശിവഭവൻ എന്ന വീട്ടിലിരുന്നു മധു നീലവെളിച്ചം കാണുകയാണ്. മനസ്സിൽ ഓർമകളുടെ കടലിരമ്പം തന്നെ നടക്കുന്നുണ്ടാകാം. അൻപത്തി ഒമ്പതു വർഷം മുമ്പ്, സിനിമാ ജീവിതത്തിന്റെ തുടക്കത്തിൽ ക്യാമറയ്ക്കു മുന്നിൽ നിന്ന ദിവസങ്ങൾ.

നീലവെളിച്ചം എന്ന സ്വന്തം ചെറുകഥയ്ക്കു ഭാർഗവീനിലയമെന്ന തിരക്കഥ എഴുതിയ വൈക്കം മുഹമ്മദ് ബഷീറും സംവിധായകൻ വിൻസെന്റും മണ്ണിൽ നിന്നു മാഞ്ഞു. മാകന്ദശാഖികളിൽ രാക്കിളികൾ മയങ്ങാറായിട്ടും വരാത്ത പ്രാണസഖിയോട് താമസമെന്തേ വരുവാൻ പ്രാണസഖീ...' എന്നു ചോദിച്ച കവി ഭാസ്കരൻ മാഷും സാന്ദ്രമധുര രാഗത്തിൽ ഏകാന്തതയുടെ അപാരതീര'ത്തിന്  ഈണം പകർന്ന ബാബുരാജും മനസ്സിൽ നിറയും പോൽ അതു പാടിയ കമുകറ പുരുഷോത്തമനും നമ്മെ വിട്ടു പോയി. കഥാപാത്രങ്ങൾക്കു ജീവൻ പകർന്ന പ്രേംനസീറും വിജയനിർമലയും അടൂർ ഭാസിയും പി.ജെ ആന്റണിയും കുതിരവട്ടം പപ്പുവും ഇന്നില്ല. ഇവരെക്കുറിച്ചൊക്കെയുള്ള ഓർമകളുടെ നീലവെളിച്ചം മധുവിന്റെ മനസ്സിൽ പരക്കുന്നുണ്ടാകും.

ആദരവായി ഒരു സിനിമ

 മധുവിന്റെ വീട്ടിലേക്കുള്ള യാത്രയിൽ റിമ പറഞ്ഞു, “ഒരു പാടു പ്രതിഭകൾ കൈയൊപ്പിട്ട "ഭാർഗവീനിലയ'ത്തിനുള്ള ആദരവാണു പുതിയ സിനിമ, നീലവെളിച്ചം. അതുകൊണ്ടാണ് തിയറ്റുകളിലെത്തും മുൻപേ മധുസാറിനെ സിനിമ കാണിക്കാൻ ആഗ്രഹിച്ചത്. ' സിനിമ കഴിഞ്ഞു മധു ഇറങ്ങി വന്നതു കുറേ ഓർമകളിൽ നിന്നാണ്. “പഴയ കാലം തന്നെയാണ് ഇപ്പോൾ മനസ്സ് നിറയെ. കുറേയൊക്കെ മറന്നു പോയതാണ്. നീലവെളിച്ചം കണ്ടപ്പോൾ അതൊക്കെ തെളിഞ്ഞു വന്നു.