Le temps viendra

'എനിക്ക് ആൾക്കൂട്ടത്തിന്റെ മനസ്സറിയാം. ആരാധകരുടെ സ്വന്തം ഹണി റോസ്

- വിജീഷ് ഗോപിനാഥ്

ഒരു ഫ്രഞ്ച് വാചകമാണ് ഹണി റോസിന്റെ ഇൻസ്റ്റാഗ്രാം പേജ് ക്യാപ്ഷൻ. Le temps viendra. അർഥം, നിങ്ങളുടെ സമയവും വരും.

തൊടുപുഴ മൂലമറ്റത്തെ സ്കൂളിൽ നിന്നു ക്യാമറ മുന്നിലേക്കുള്ള വഴി തെളിഞ്ഞിട്ടു 18 വർഷം ആ യാത്രയിൽ എന്നും കൈ നിറയെ സിനിമകളുണ്ടായിരുന്നില്ല. ഒരുപാട് ഉയർച്ച താഴ്ചകൾ. ട്രിവാൻഡ്രം ലോഡ്ജും ദൈവത്തിന്റെ സ്വന്തം ക്ലീറ്റസും റിങ് മാസ്റ്ററും മോൺസ്റ്ററും വീരസിംഹറെഡിയുമൊക്കെ ശ്രദ്ധിക്കപ്പെട്ടപ്പോഴും അതുപോലെ ഇടവേളകളുമുണ്ടായിരുന്നു. എന്നിട്ടും ഹണിറോസ് ഇന്നും ആൾക്കൂട്ടത്തിനു നടുവിൽ തരംഗമാണ്. കേരളത്തിൽ മാത്രമല്ല, തെലങ്കാനയിലും ആന്ധ്രയിലും എന്തിന് അയർലൻഡിൽ പോലും ഹണി ഹരമായി.

കൈനിറയെയുള്ള ഉദ്ഘാടനങ്ങളോടൊപ്പം മലയാളത്തിൽ വീണ്ടും നായികയാകാനുള്ള ഒരുക്കത്തിലാണ് ഹണി. എബ്രിഡ് ഷൈൻ അവതരിപ്പിക്കുന്ന, ആനന്ദിനി ബാല സംവിധാനം ചെയ്യുന്ന റേച്ചൽ' എന്ന സിനിമയിലെ ടൈറ്റിൽ റോൾ.

ഇത് ഹണിറോസിന്റെ സമയമാണോ?

സിനിമയ്ക്ക് എന്നെയല്ല ആവശ്യം, എനിക്കു സിനിമ യെയാണ്. അതെനിക്കു നന്നായറിയാം. സിനിമ നിർത്തി പോകേണ്ട ഒരുപാട് അവസരങ്ങൾ ഉണ്ടായിട്ടു ണ്ട്. പക്ഷേ, അതെല്ലാം മറികടക്കുന്നതു വലിയ വലിയ പ്രതീക്ഷകൾ മനസ്സിൽ സൂക്ഷിക്കുന്നതു കൊണ്ടാണ്.

എന്നെ സംബന്ധിച്ചിടത്തോളം സിനിമ ഒരു മിഷൻ ഓഫ് ഹോപ് ആണ്. കിട്ടുന്ന കഥാപാത്രങ്ങളെല്ലാം നൂറു ശതമാനം ആത്മാർഥമായേ ചെയ്തിട്ടുള്ളൂ. ഇപ്പോൾ നല്ല കഥാപാത്രങ്ങൾ തേടി വരുന്നു. ഉദ്ഘാടനങ്ങൾ ഉൾപ്പടെ ഒരുപാട് ഇവന്റ്സ്... ഇതൊക്കെ എന്നും ഒപ്പമുണ്ടാകും എന്ന വിശ്വാസവുമില്ല. പക്ഷേ, പ്രതീക്ഷയുണ്ട്. അതിലാണ് നിലനിൽക്കുന്നത്. എല്ലാം ദൈവം തരുന്നതല്ലേ...

സിനിമയിൽ നിൽക്കുക അത്ര എളുപ്പമുള്ള കാര്യമല്ല. സമ്മർദങ്ങൾ വലുതാണ്. അടുപ്പിച്ചു രണ്ടു സിനിമ വിജയിച്ചില്ലെങ്കിൽ ഭാഗ്യമില്ലാത്ത നടിയെന്നു മുദ്ര കുത്തും. ബോഡി ഷെയ്മിങ്ങും സോഷ്യൽമീഡിയയിലെ ആക്രമണങ്ങളും വേറെ. ഇതിനെയൊക്കെ മറി കടന്നു വേണം പിടിച്ചു നിൽക്കാൻ.

തെലുങ്കിലും താരമായല്ലോ?