8 ஆண்டுகளுக்குப்பின் மீண்டும் மினி உலகக் கோப்பை!

விறுவிறுப்பாகத் தொடங்கியிருக்கிறது 9வது ஐசிசி சாம்பியன்ஸ் டிராபி. மினி உலகக் கோப்பை என வர்ணிக்கப்படும் இந்தக் கிரிக்கெட் போட்டி எட்டு ஆண்டுகளுக்குப் பிறகு இப்போதுதான் மீண்டும் நடக்கிறது.

- பேராச்சி கண்ணன்

இதில் இந்தியா, ஆஸ்திரேலியா, இங்கிலாந்து, பங்களாதேஷ், ஆப்கானிஸ்தான், நியூசிலாந்து, தென்னாப்பிரிக்கா, பாகிஸ்தான் ஆகிய எட்டு அணிகள் விளையாடுகின்றன.

முதல்முறையாக இலங்கை அணி இந்த டிராபியில் கலந்துகொள்ளும் தகுதியை இழந்திருக்கிறது. வெஸ்ட்இண்டீஸ் அணி கடந்த 2023ம் ஆண்டு நடந்த உலகக் கோப்பைக்கே தகுதி பெறவில்லை. இந்தச் சாம்பியன்ஸ் டிராபிக்கு உலகக் கோப்பையின் புள்ளிப் பட்டியலில் முதல் எட்டு இடங்களைப் பிடிக்கும் அணிகள்தான் முன்னேறும். அப்படியாக 9ம் இடம் பிடித்து வாய்ப்பை தவறவிட்டது இலங்கை.

தற்போது இந்தப் போட்டிகளை பாகிஸ்தான் மற்றும் ஐக்கிய அரபு எமிரேட்ஸ் நாடுகள் இணைந்து நடத்துகின்றன. முதலில் பாகிஸ்தான்தான் தனியாக இந்தப் போட்டிகளை நடத்துவதாக இருந்தது. 

ஆனால், இந்திய அணி பாதுகாப்புக் கருதி பாகிஸ்தானில் விளையாட மறுத்ததால், இந்திய அணி விளையாடும் போட்டிகள் மட்டும் பொதுவான இடமாக துபாய்க்கு மாற்றப்பட்டிருக்கின்றன. ஒருவேளை இந்திய அணி அரையிறுதிக்கும், இறுதிப் போட்டிக்கும் முன்னேறினால் அதுவும் துபாயில்தான் நடக்கும்.

இந்தமுறை இந்திய அணி, பங்களாதேஷ், பாகிஸ்தான், நியூசிலாந்து ஆகிய அணிகள் அடங்கிய குரூப் ஏ பிரிவில் உள்ளது. தென்னாப்பிரிக்கா, இங்கிலாந்து, ஆப்கானிஸ்தான், ஆஸ்திரேலியா ஆகிய அணிகள் குரூப் பி பிரிவில் இருக்கின்றன. 

ஒவ்வொரு பிரிவிலும் உள்ள அணிகள் மற்ற அணிகளுடன் மோத வேண்டும். இதில் ஒவ்வொரு பிரிவிலும் முதலிரண்டு இடங்களைப் பிடிக்கும் அணிகள் அரையிறுதிக்கு முன்னேறும். பிறகு இறுதிப் போட்டி. இந்நிலையில் இந்த சாம்பியன்ஸ் டிராபியை யார் வெல்வார் என்ற கணிப்புகள் பரபரப்பாகப் பேசப்பட்டு வருகின்றன.

*எப்போது தொடங்கியது? ஐசிசி சாம்பியன்ஸ் டிராபி 1998ம் ஆண்டு தொடங்கப்பட்டது. குறிப்பாக, டெஸ்ட் கிரிக்கெட் விளையாடாத நாடுகளில் கிரிக்கெட் விளையாட்டை மேம்படுத்தும் நோக்கில் ஒரு குறுகிய கால கிரிக்கெட் போட்டியாக சாம்பியன்ஸ் டிராபியை நடத்த சர்வதேச கிரிக்கெட் கவுன்சிலான ஐசிசி திட்டமிட்டது. அதுவும் கிரிக்கெட் வளர்ந்து வரும் நாடுகளில் நடத்துவதாக முடிவெடுக்கப்பட்டது.