ചുമ്മാ മനുഷ്യനെ മെനക്കെടുത്താൻ..

അയ്യോ... എന്റെ പത്തുപവന്റെ മാല പോയേ

- വി.ആർ. ഹർഷൻ 9845182814

ചത്തുകിടന്നാലും ചമഞ്ഞുകിടക്കണമെന്ന ചിന്താഗതിയാണ് നാട്ടിൻപുറത്തുകാരിയായ മോളിക്കുട്ടിക്ക്. അതു കൊണ്ട് പുറത്തു പോകുമ്പോളെല്ലാം അവൾ ചമഞ്ഞിറങ്ങും. വയസ്സ് നാൽപ്പതുണ്ടെങ്കിലും ബ്യൂട്ടി പാർലറുകാരുടെ കരവിരുതുകൊണ്ട് മുപ്പതേ തോന്നിപ്പിക്കൂ! ഭർത്താവ് തങ്കച്ചൻ വർഷങ്ങളായി ഗൾഫിൽ ആയതിനാൽ നല്ല സാമ്പത്തികമാണ്. ഗൾഫന്റെ ഭാര്യയാണെന്ന ഗമയും, നെഗളിപ്പും മോളിക്ക് ഉണ്ടെന്നാണ് ജനസംസാരം. വിദേശത്ത് ജോലി ഇല്ലാത്തവരെ, അവൾക്ക് പുച്ഛമാണ്. നാട്ടിൽ തൂമ്പ കൊണ്ടു തൊടാത്ത പലരും ഗൾഫിൽ അറബിയുടെ കക്കൂസ് കഴുകുകയാണെന്ന പരമാർത്ഥമുണ്ടോ മോളിക്കുട്ടി അറിയുന്നു. അത് അവരുടെ വിവരദോഷം! മോളിക്കുട്ടി ഷോപ്പിംഗിനും ബാങ്കിലും, പാർലറിലും മറ്റും പോകുന്നതു കാറിലാണ്.