உண்மை இல்லாத எந்த ஒன்றும் நிலை பெறாது!

தூத்துக்குடி மாவட்டத்தில் உள்ள வீரபாண்டியபட்டினம் என்ற கடலோர கிராமம்தான், ஆசிரியையும், எழுத்தாளருமான ரம்யா அருண்ராயன் அவர்களின் சொந்த ஊராகும். தற்போது, கோவை மாவட்டத்தின் அரசுப்பள்ளி ஒன்றில் மேல்நிலை இயற்பியல் ஆசிரியையாக பணியாற்றி வருகிறார்.

- ரம்யா அருண்ராயன்

சீரோடிகிரி பதிப்பக வெளியீடாக இவருடைய ‘கழி ஓதம்' என்ற முதல் சிறுகதை தொகுப்பு வெளியாகி உள்ளது. இதற்கு முன்பு 'செருந்தி' என்ற கவிதை தொகுப்பு வெளிவந்து வாசகர் வட்டத்தில் பரவலான கவனத்தை பெற்றுள்ளது. அண்மையில், 'கானல்' அமீரகம் நடத்திய சிறுகதைப் போட்டியில், இவருடைய ‘வவ்வாக்குட்டி' என்ற சிறுகதை இரண்டாம் பரிசினை வென்றது குறிப்பிடத்தக்கது.

எழுத்தாக்கம், தனித்தன்மை, பெண் அரசியல் பற்றி மகிழ்ச்சியோடு ரம்யா அருண்ராயன் பதிவு செய்கிறார்....

நான் நெய்தல் நிலத்தைச் சேர்ந்தவள் என்பதால் முதன் முதலாக என்னுடைய புத்தகம் வெளியான போது, நம்முடைய நெய்தல் நிலம் சார்ந்த எதாவது ஒரு கருப்பொருளை எடுத்துக் கொண்டு பெயர் வைக்க வேண்டும் என நினைத்தேன். அவ்வாறு நெய்தல் நிலம் சார்ந்த மலர்கள் என்னவெல்லாம் உள்ளன என்று தேடிய போது, இந்த 'செருந்தி' பெயர் எனக்கு மிகப் பிடித்திருந்தது. சாதாரணமாக மலர்கள் என்றாலே, மென்மையான பெயர் கொண்டவையாக இருக்கும். ஆனால், இந்த பெயர் 'செரும் தீ' என்ற ஒரு அர்த்தத்தையும் தருவதால், இதை என்னுடைய புத்தகத்தின் பெயராக தேர்ந்தெடுத்தேன்.

அடுத்ததாக, மழை நீர் ஓடையாக வந்து, கடலில் சேரும் இடத்தை 'கழி முகம்' என்று கூறுவார்கள். சில நேரங்களில், கடல் நீர் அந்த ஓடைகளுக்குள் புகுவதைத்தான் 'கழி ஓதம்' என்று குறிப்பிடுவார்கள். அதுபோன்று நமக்குள் அலையடித்துக் கொண்டிருக்கும் சிந்தனைகளை, மற்றவர்களுக்கு கடத்தும் ஒரு கருவியாக நான் எழுத்தை பார்க்கிறேன்.

‘கழி ஓதம்' என்ற பெயரை தேர்ந்தெடுத்தேன். இரண்டுமே நெய்தல் நிலம் தொடர்பான பெயர்களாகவே அமைந்துவிட்டது கூடுதல் மகிழ்ச்சியை அளிக்கிறது.