Huisgenoot: Carmen Niehaus 100 beste resepte - 2021

En este asunto

Twee-en-dertig jaar. ’n Leeftyd lank. Wat ’n voorreg om vir daardie tydperk die kosredakteur te kon wees van die land se grootste tydskrifte, Huisgenoot en YOU. Vir my was die grootste lekkerte die bydrae wat Huisgenoot se lesers altyd gelewer het. Die immergewilde Wenresepte met resepte wat lesers nog gepos het, is uitgebou na heerlike kosreise die land vol waarop ek vele uitstaande kokke op die mooiste plekke ontmoet het. Hierdie boek is ’n allegaartjie gekies uit 32 jaar se resepte uit my kombuispen, en van my heel grootste gunstelinge.

Huisgenoot: Carmen Niehaus 100 beste resepte Magazine Description:

Carmen Niehaus se 100 beste resepte Daar is min Suid-Afrikaners wat nie die legendariese Carmen Niehaus ken nie. Twee-en-dertig jaar lank was sy kosredakteur van Huisgenoot en YOU, en later ook van Drum. Nou het sy uit die derduisende resepte wat die afgelope dekades onder haar wakende oog in die tydskrif-toetskombuis berei is, dié gekies wat sy die graagste tuis vir haar gesin en vriende maak – hartskos uit haar eie kombuis. Die bundel is deurspek met herinneringe aan die mense wat deur die jare saam met haar gekook het, lesse uit haar ma se plaaskombuis en raad oor wat alles met gunsteling-bestanddele opgetower kan word. Moet jy gaste onthaal? Braai ’n Karoo-lamsboud. Kom jy moeg tuis ná ’n lang werkdag? Gooi ’n vullende slaai bymekaar. Moet jy groente in die kinders se lyf kry? Hulle sal nie kan nee sê vir sampioenlasagne nie. Wil jy die hordes voer? Maalvleis is jou antwoord! En vir al die suikertande is daar natuurlik meer as genoeg poedings, terte, koeke en ander lekkernye. Moenie dié bêre-uitgawe misloop nie – jy sal keer op keer daarheen wil terugkeer om saam met Carmen jou eie, heerlike kosherinneringe te bou.