മഴക്കാല രോഗങ്ങളും പ്രതിരോധമാർഗ്ഗങ്ങളും

വേനൽക്കാലം കഴിഞ്ഞ് മഴക്കാലം വരുമ്പോൾ ആരോഗ്യ കാര്യങ്ങളിൽ വളരെയധികം ശ്രദ്ധ ചെലുത്തണം

കടുത്ത വേനലിനു ശേഷം കുളിരേകാൻ മഴക്കാലം എത്തിയെന്ന ആശ്വാസത്തിലാണ് നമ്മളോരോരുത്തരും. എന്നാൽ മഴക്കാലം വിവിധതരത്തിലു ള്ള രോഗങ്ങൾ പടർന്നുപിടിക്കപ്പെടുന്ന കാലം കൂടിയാണ്. അതുകൊണ്ടുതന്നെ ഇത്തരം രോഗങ്ങൾ വരാതിരിക്കാനും നമ്മുടെ രോഗപ്രതിരോധശേഷി വർദ്ധിപ്പിക്കുന്നതിനുമുള്ള മുൻകരുതലുകൾ എടു ക്കേണ്ടത് അത്യാവശ്യമാണ്.

മഴക്കാല രോഗങ്ങളെ പൊതുവേ ജലത്തിലൂടെ പകരുന്നവ, വായുവിലൂടെ പകരുന്നവ, കൊതുകുകൾ പരത്തുന്ന രോഗങ്ങൾ എന്നിങ്ങനെ മൂന്നായി തരം തിരിക്കാം. കോളറ, ടൈഫോയിഡ്, മഞ്ഞപ്പിത്തം, എലിപ്പനി മുതലായവയാണ് ജലത്തിലൂടെ പകരുന്ന പ്രധാന രോഗങ്ങൾ. ചുമ, ജലദോഷം എന്നീ രോഗലക്ഷണങ്ങളോട് കൂടി വായുവിലൂടെ പകരുന്ന രോഗങ്ങൾ ഉണ്ടാകുന്നു. ഡെങ്കിപ്പനി, ചിക്കൻഗുനിയ എന്നിവയാണ് കൊതുകുകൾ പരത്തുന്ന രോഗങ്ങൾ.