உதய் அண்ணா கூட சேர்ந்து ஒரு டபுள் ஹீரோ சப்ஜெட்!

’அப்பா உட்பட எனது குடும்பத்தைச் சேர்ந்த யாருமே நான் நடிப்புத் துறைக்குள் வருவேன் என்று கொஞ்சமும் எதிர்பார்க்கவில்லை. அந்த முடிவுக்கு முழுக்க முழுக்க அண்ணன் உதயநிதிதான் இன்ஸ்பிரேஷன்' பெரிய இடத்துப்பிள்ளை என்பதற்கான அறிகுறிகள் எதுவுமின்றி மிக சகஜமாக தோழமை உணர்வுடன் பேசுகிறார் அருள்நிதி.

- மகிழ் மூர்த்தி

‘திருவின் குரல்' படம் மூலமாக வாய்பேச முடியாத, காது கேளாத மாற்றுத்திறனாளியாக தனது நடிப்பில் இன்னொரு பாய்ச்சல் நிகழ்த்தியிருக்கும் அருள்நிதிக்கு அடுத்தடுத்து ‘கழுவேர்த்தி மூர்க்கன்', ‘டிமாண்டி காலனி 2' என்று ரிலீஸுக்குப் படங்கள் கியூ கட்டி நிற்கின்றன.

‘அந்திமழை'க்காக பேட்டி என்றதும்  ‘அப்பாயின்ட்மெண்ட் கேக்குற அளவுக்கு நான் அவ்வளவு பெரிய  நடிகன்லாம் இல்ல. நினைச்ச நேரத்துக்கு கிளம்பி வாங்க சார்' என்கிறார்.

உரையாடல், சுமார் 6 மாத காலத்துக்குள் தொடர்ந்து அடுத்தடுத்து 6 படங்கள் ரிலீஸானது குறித்து ஆரம்பமாகிறது.

 ‘என்னடா இந்த அருள்நிதி ஓவர் சுறுசுறுப்பாகி, வரிசையா படங்கள் நடிச்சுத்தள்ளிக்கிட்டேயிருக்கானேன்னுதானே நினைக்கிறீங்க. அதெல்லாம் ஒண்ணும் இல்லை. இதுல 4 படங்கள் கொரோனாவுக்கு முந்தி ஆரம்பிச்சது. அப்படியே பெண்டிங்ல கிடந்து இப்ப வரிசையா ரிலீஸாகுது' என்றவர் தனது தொடக்ககால  பயணத்துக்குப் போனார்.

‘நான் சினிமாத் துறைக்குள் வருவேன். அதிலயும் நடிகனாக வருவேன்னு என் குடும்பத்துல யாருமே எதிர்பார்க்கலை. குறிப்பா அப்பாவுக்கு பயங்கர ஷாக். ‘நடிகனா ஜெயிக்கிறது சாதாரண விஷயம்னு நினைக்கிறியா? உன் மேல நம்பிக்கை இருக்கு. ஆனாலும், சமாளிப்பியா?'ன்னுதான் முதல்ல கேட்டார். அந்தக் கேள்வியில என் மேல இருக்கிற  சந்தேகத்தை விட அக்கறைதான் அதிகம் இருக்கிறதைப் புரிஞ்சிக்கிட்டேன்.