குடும்பத் தலைவி + பிசினஸ் வுமன் = சூப்பர் வுமன்!

சமூக வலைத்தளங்களிலும், பிசினஸ் பத்திரிகைகளிலும் வைரலாகிக் கொண்டிருக்கும் ஒரு பெயர், சங்கீதா பாண்டே. எந்தவித பின்புலமும் இல்லாமல் வெறும் 1,500 ரூபாய் முதலீட்டில் ஆரம்பித்து, கோடிகளில் டர்ன் ஓவர் செய்யும் ஒரு பிசினஸை நடத்தி வரும் தொழில் அதிபர் இவர். தன்னுடைய சாதனைக்காக 2020ம் வருடம் ‘சூப்பர் வுமன்’ என்ற விருதை தன்வசமாக்கியுள்ளார் சங்கீதா.

- த.சக்திவேல்

யார் இந்த சூப்பர் வுமன்?

உத்தரப்பிரதேசத்திலுள்ள கோரக்பூர் நகரைச் சேர்ந்தவர் சங்கீதா பாண்டே. இவரது கணவர் டிராஃபிக் கான்ஸ்டபிளாக வேலை செய்து வருகிறார். பத்து வருடங்களுக்கு முன்பு குடும்பத்தின் பொருளாதாரச் சூழலை மேம்படுத்துவதற்காக வீட்டுக்கு அருகிலிருந்த ஒரு நிறுவனத்தில் வேலைக்குச் சேர்ந்தார்.

மாதச் சம்பளம் 4000 ரூபாய். அப்போது அவருக்கு பிறந்து ஒன்பது மாதமே ஆன ஒரு மகள் இருந்தாள். அதனால் மகளைத் தூக்கிக் கொண்டே முதல் நாள் வேலைக்குச் சென்றார் சங்கீதா.

குழந்தையை வைத்துக்கொண்டு வேலையைப் பார்க்க முடியாது என்று உடன் வேலை செய்தவர்கள் சங்கீதாவிடம் சொல்லியிருக்கின்றனர். அடுத்த நாள் குழந்தையை வீட்டிலேயே விட்டுவிட்டு வேலைக்கு வந்திருக்கிறார். குழந்தையின் எதிர்காலத்துக்காகத்தான் வேலைக்கு வந்திருக்கிறோம் என்பது ஒரு பக்கம் இருந்தாலும், குழந்தையைக் கவனித்துக்கொள்ளாமல் வேலைக்கு வந்தது சங்கீதாவுக்குள் குற்ற உணர்வைக் கொடுத்தது. இரண்டாம் நாளே வேலையை விட்டுவிட்டு வீட்டுக்கு வந்துவிட்டார்.