நந்திதாவுக்கு என்ன பிரச்னை..?

ஆம். ‘அட்டகத்தி’ ஹீரோயினேதான். இயக்குநர் பா.இரஞ்சித் மூலமாக அறிமுகமானவர். தொடர்ந்து, ‘எதிர்நீச்சல்’, ‘இதற்குத் தானே ஆசைப்பட்டாய் பாலகுமாரா’, ‘முண்டாசுப்பட்டி’ என வேகமாக வலம் வந்தவரை கொஞ்ச நாட்களாகக் காணோம். என்ன ஆச்சு என விசாரித்தால், ‘ஃபைப்ரோமியால்ஜியா’ என்ற வினோதமான தசை அழற்சி நோயால், தான் பாதிக்கப்பட்டுள்ளதாகத் தெரிவித்துள்ளார் நந்திதா.

- ஜான்சி

‘‘இதனால் என் உடல் எடை கடுமையாகக் குறைத்துள்ளது. ஒரு சிறிய வேலை செய்தால் கூட தசைகளில் பிரச்சினையை ஏற்படுத்துகிறது. கடினமான வேலைகளையும் உடற்பயிற்சியையும் செய்ய முடியவில்லை. சில நேரங்களில் உடனடியாக நகர்வதற்குக் கூட கடினமாக இருக்கிறது...” எனவும் கூறியுள்ளார்.

ஓகே. அது என்ன ஃபைப்ரோமியால்ஜியா..?“

பல்வேறு சிக்கலான நோய்களுக்கு சிகிச்சைகளைக் கண்டுபிடித்து மருத்துவ உலகம் வேகமாக முன்னேறி வருகிறது. அதேநேரம், மருத்துவ ஆராய்ச்சியாளர்களால் கண்டுபிடிக்க முடியாத சில அரிய நோய்களும் உள்ளன. ஃபைப்ரோமியால்ஜியா அவற்றில் ஒன்று.

பெரும்பாலும் எலும்புக்கூடு, மூட்டுகள், தசை நாண்கள், தசைகள், தசைநார்கள், குருத்தெலும்பு போன்றவற்றை உள்ளடக்கிய தசைக்கூட்டையும் உடலின் நரம்பு மண்டலங்களையும் பாதிக்கக்கூடிய ஒரு  நாள்பட்ட நோய் இது.