ரஜினி Vs கமல் சண்டைதான் இந்தப் படம்!.

‘டி டி ரிட்டர்ன்ஸ்’ ஹிட்டுக்குப் பிறகு வெளியாகவுள்ளது சந்தானத்தின் ‘80ஸ் பில்டப்’. கல்யாண் இயக்கியுள்ளார். இவர் ‘குலேபகாவலி’, ‘ஷூ’, ‘காத்தாடி’, ‘ஜாக்பாட்’, ‘கோஸ்டி’ உட்பட பல படங்களை இயக்கியவர். படப்பிடிப்பு முடிந்து கிராஃபிக்ஸ் வேலையில் பிஸியாக இருந்த கல்யாணிடம் பேசினோம்.

- எஸ்.ராஜா

‘80ஸ் பில்டப்’ - டைட்டில் நல்லாயிருக்கு…?

ஃபேமிலி, யூத், கிட்ஸ் என அனைத்து தரப்பும் என்ஜாய் பண்ணி பார்க்குமளவுக்கு காதல், காமெடி, சென்டிமென்ட், ஃபேன்டஸி என அனைத்து அம்சங்களும் கலந்த படம் இது.

80களில் ஒரு சாவு வீட்டில் கதை நடக்கிறது. 

தாத்தா - பேரன், அண்ணன் - தங்கை என இருதரப்புக்குமிடையே நடக்கும் போட்டிதான் படம். தாத்தா ரஜினி ரசிகர். பேரன் கமல் ரசிகர்.‘சகலகலாவல்லவன்’ படத்தை முதல் நாள், முதல் காட்சியை பார்ப்பதற்கு பேரன் முயற்சி செய்கிறார். தாத்தா, வில்லங்கமான ஒரு முடிவை எடுத்து பேரனை படம் பார்க்காமல் தடுத்துவிடுகிறார்.

இதற்கிடையே தன் வீட்டுக்கு வந்த நாயகியை ஒரே நாளில் காதலில் வீழ்த்துவதாக தங்கையிடம் சவால்விடுகிறார் அண்ணன்.தாத்தாவுக்கும் பேரனுக்குமான போட்டியில் கமல் ஜெயித்தாரா, ரஜினி ஜெயித்தாரா; தங்கைக்கும் அண்ணனுக்குமான சவாலில் யார் ஜெயிக்கிறார்கள் என்பதை நகைச்சுவையுடன் சொல்லியுள்ளேன்.

சந்தானம் எப்படி படத்துக்குள் வந்தார்?

சந்தானம் சாருக்காக எழுதிய கதை இது. சந்தானம் சார் காமெடி எனக்கு பிடிக்கும். விஷால் நடித்த ஒரு படத்தில் பூங்காவனம் கேரக்டரில் ‘முதலாளி... முதலாளி...’ என அலப்பறை பண்ணியிருப்பார். எனக்கு எப்போதெல்லாம் மன அழுத்தம் ஏற்படுகிறதோ அப்போதெல்லாம் அந்த காமெடியைப் பார்த்து மன அழுத்தத்தைப் போக்கிக் கொள்வேன்.

இயக்குநர் என்பதைத்தாண்டி ரசிகனாக சந்தானம் சார் படங்கள் பிடிக்கும். என்னுடன் பழகியவர்கள், ‘நீங்கள் சந்தானம் மாதிரியே காமெடி பண்ணுகிறீர்கள், ஏன் சந்தானத்தை வைத்து படம் பண்ணக்கூடாது’னு கேட்டதுண்டு.

அப்படி, சந்தானம் சாருக்காக எழுதியதுதான் இது. கதை ரெடியானதும் சந்தானம் சாரிடம் சொன்னேன். ஆரம்பத்தில் படம் பண்ணுவதில் நிறைய போராட்டம் இருந்தது. கடைசியாக, ஸ்டூடியோ க்ரீன் ஞானவேல்ராஜா சார் என் மீது வைத்திருந்த நம்பிக்கையிலும், சந்தானம் சார் மீது வைத்திருந்த நம்பிக்கையிலும் இந்தப் படத்தைத் தயாரிக்க முன்வந்தார்சந்தானம் சாரை டீல் பண்ணுவதில் எனக்கு எந்த சிரமமும் இருந்ததில்லை.