வாட் ஏ கருவாடு

ஆன்லைன் பிசினஸில் சக்கைப்போடு போடுகிறார் கலை கதிரவன்

எஞ்சினியரிங் முடித்துவிட்டு நல்ல நிறுவனத்தில் கைநிறைய சம்பளம் வாங்கும் பல இளைஞர்கள் திடீரென அந்த வேலையை உதறிவிட்டு சொந்தமாக பிசினஸ் தொடங்குவதும், இயற்கை விவசாயம் நோக்கி நகர்வதும் கடந்த சில ஆண்டுகளாகவே இருந்துவரும் ட்ரெண்ட்!  அப்படியாக சொந்த ஊரில் சொந்த பிசினஸிற்குள் நகர்ந்த இளைஞர் கலை கதிரவன். ஆனால், யாருமே எதிர்பார்க்காத ஒரு பிசினஸிற்குள் நுழைந்தார் என்பது ரொம்பவே ஆச்சரியம். அதுமட்டுமல்ல. அந்தத் தொழில் அவருக்கும்கூட புதியதுதான்.

அவருடன் அவரின் நண்பர் கிருஷ்ணசாமியும் கைகோர்க்க, இருவரும் தங்களுடைய கடினமான உழைப்பாலும், தரமான தயாரிப்பாலும் இன்று பலரின் கவனத்தைப் பெற்ற இளைஞர்களாக நிமிர்ந்து நிற்கிறார்கள். சமீபத்தில் தமிழ்நாடு அரசின் டான்சிம் (TANSIM - Startup TN) சிறந்த ஸ்டார்ட்அப்பாகப் பாராட்டி இவர்களின் நிறுவனத்தில் முதலீடு செய்திருக்கிறது. இதனால், இன்னும் உத்வேகத்துடன் பணிகளைச் செய்து வருகின்றனர் கலை கதிரவனும், கிருஷ்ணசாமியும்.

சரி, இருவரும் அப்படி என்ன பிசினஸ் செய்கிறார்கள் என்றுதானே கேட்கிறீர்கள்?

கருவாடு. ஆம். ஆன்லைனில் கருவாடு விற்பனையை இந்தியா முழுவதும் கனஜோராகச் செய்துகொண்டிருக்கும் இளைஞர்கள் இவர்கள். மதுரை ரயில்நிலையத்திலும், ‘ஒரு நிலையம் ஒரு தயாரிப்பு’ திட்டத்தில் இவர்கள் கடைவிரித்துள்ளனர். ‘‘கடந்த அஞ்சு ஆண்டுகளாக இந்த பிசினஸில் இருக்கோம். கொரோனாவுக்குப் பிறகு இப்பதான் நல்லபடியாக டேக்அப் ஆகிருக்கு. ஆரம்பத்துல கருவாடு பத்தி எனக்கு எதுவும் தெரியாது. எல்லாவற்றையும் படிப்பினைகள் மூலமே கத்துக்கிட்டேன்...’’ எனச் சிரித்தபடியே பேசுகிறார் கலை கதிரவன்.

‘‘எனக்கு ராமநாதபுரம் பக்கத்துல தெற்குவாணிவீதினு ஒரு கிராமம். பிளஸ் டூ வரை ராமநாதபுரத்துலதான் படிச்சேன். பிறகு, ஓசூர்ல பி.டெக் பயோடெக்னாலஜி பண்ணினேன். அப்புறம், பெங்களூர்ல சில ஆண்டுகள் வேலை செய்தேன். பிறகு, சென்னையில் வேலை செய்தேன். கடைசியாக கடலூர்ல ஒரு பூச்சிக்கொல்லி மருந்து நிறுவனத்துல சுற்றுச்சூழல் துைற பிரிவுல உதவி மேலாளராக இருந்தேன்.