નવયુવાન માંગે રોજગાર 'અગ્નિપથ' પર અડી સરકાર

જે દેશમાં પોસ્ટ ગ્રેજ્યુએટ અને બીટેક કરેલા નવયુવાનોને કોર્પોરેટ સેક્ટરમાં યોગ્ય પગાર પર નોકરી નથી મળી રહી, આ ૧૦ અને ૧૨ પાસને શું મળશે? આર્મીમાંથી રિજેક્ટેડનો ઠપ્પો લાગેલ આ ૪ વર્ષની નોકરીવાળા ‘અગ્નિવીરો’ને કોણ પૂછશે?

- મદન કોથુનિયાં

ભણેલોગણેલો સુનીલ પૂનિયાં ૫ વર્ષ પહેલાં ગરીબી અને આર્થિક સંકડામણથી પરેશાન થઈને પોતાના સપનાંને પાંખો લગાવવા માટે ગામથી પોતાનું ઘર છોડીને જયપુર આવ્યો હતો. તેમની આંખોમાં ઉજ્વળ ભાવિનાં સપનાં હતાં અને દિલમાં આકરી મહેનત કરીને સેનામાં ભરતી થવાનો સંકલ્પ હતો, પણ હવે આશાનો પાલવ છૂટતો જઈ રહ્યો છે.

શરીરથી તગડો સુનીલ પૂનિયાંનું કહેવું છે કે, વર્ષ ૨૦૧૯માં ૧૨મું ધોરણ પાસ કર્યા પછી મને અહેસાસ થયો કે હવે હું સેનામાં ભરતી માટે લાયક છું અને મારા ઘરવાળાને પણ આશા હતી કે હું તેમના સપનાંને પૂરા કરીશ, તેથી તેમણે લાખો રૂપિયા ખર્ચ કરીને મને જયપુર જેવા મોંઘા શહેરમાં મોકલ્યો અને શિક્ષણનો પૂરો ખર્ચ પણ ઉઠાવ્યો. ૩ વર્ષ થઈ ગયા સેનાની તૈયારી કરતા, પરંતુ ‘અગ્નિવીર’ પૂરી આશા પર પાણી ફેરવી દીધું છે.’

અજમેરનાં રહેવાસી સૂરજ કુમાર મજૂર પરિવારમાંથી આવે છે. તેમને બાળપણથી સેનામાં નોકરી કરવાનું ઝનૂન હતું. તેમણે વર્ષ ૨૦૧૮માં સેનામાં ભરતીની તૈયારી શરૂ કરી હતી.

માર્ચ, ૨૦૨૧માં તેમણે ફિઝિકલ અને મેડિકલ ટેસ્ટ પણ ક્વોલિફાય કરી લીધી, પણ પછી સેનામાં ભરતી માટે આગળની પરીક્ષા જ ન લેવાઈ અને ૧૫ મહિના રાહ જોવામાં વેડફાઈ ગયા.

સૂરજ કુમારની જેમ ગજેન્દ્ર સિંહ પણ એક ગરીબ ખેડૂત પરિવારમાં આવે છે અને છેલ્લાં ૩ વર્ષથી સેનાની તૈયારી કરી રહ્યો છે. તેણે પણ ગત વર્ષે જ મેડિકલ ટેસ્ટ ક્વોલિફાય કરી હતી, પણ ‘અગ્નિપથ યોજના’ આવતા જ તેની આશા પર પાણી ફરી વળ્યું છે.

સીકરના રહેવાસી નરેન્દ્ર જાખડે બાળપણથી માત્ર સેનામાં જવાનું સપનું જોયું છે. તેમના પિતા સામાન્ય ખેડૂત છે અને લોન લઈને દર મહિને ૪,૦૦૦ રૂપિયાની ફી ભરીને કોઈ સંસ્થામાં અભ્યાસ કરાવી રહ્યા હતા, પણ ‘અગ્નિપથે’ તેમને અંદરથી તોડી નાખ્યા છે. તેમને નથી ખબર કે પરિવારનું લેણું કેવી રીતે ઊતરશે અને માત્ર ૪ વર્ષની નોકરીવાળા સાથે લગ્ન પણ કોણ કરશે.

ચૂરુ જિલ્લાના રહેવાસી અમિત સિંહ પણ ૩ વર્ષથી સેનાની તૈયારી કરી રહ્યા છે અને તે તેમના માટે છેલ્લી તક હતી. આ વખતે ક્વોલિફાય કરવાનો પૂરો વિશ્વાસ હતો, પણ તેમને હવે બીજી ચિંતા સતાવે છે. હવે તે ‘અગ્નિવીર’ની ભરતીમાં ભાગ લેવાની યોગ્યતા નથી ધરાવતો. તેને ચિંતા છે કે અભ્યાસ માટે લીધેલી લોન કેવી રીતે ચૂકવશે.