ആവേശപൂർവം അവക്കാഡോ

അവക്കാഡോയും ദുരിയാനും വാണിജ്യാടിസ്ഥാനത്തിൽ കൃഷി

"ലോകം മുഴുവൻ അവകാഡോ ആരാധകരാവു ന്ന സ്ഥിതിയുണ്ടിപ്പോൾ. അത്രയധികമുണ്ട് പോഷകമൂല്യം. യൂറോപ്പിലും അമേരിക്കയിലുമെല്ലാം പ്രിയപ്പെട്ട ബെയ്ക് ഫാസ്റ്റ് ആണിന്ന് അവകാഡോ വിഭവങ്ങൾ. തോക്കുധാരികൾ കാവൽ നിന്ന് കൃഷി ചെയ്തെടുക്കുന്ന പഴം എന്നു പറഞ്ഞാൽ അതിശയോക്തിയല്ല. അവക്കാഡോ ഉൽപാദക രാജ്യങ്ങളിൽ മുൻനിരയിലുള്ള മെക്സിക്കോയിലെ സ്ഥിതിയാണിത്. മെക്സിക്കൻ ലഹരി മാഫിയ സംഘങ്ങൾ പലതുമിപ്പോൾ ലഹരിക്കടത്തിനു പകരം അവക്കാഡോ കൃഷിക്കാരെ തട്ടിക്കൊണ്ടു പോയി വിലപേശലിനു ശ്രമിക്കുന്നുവെന്നാണ് വാർത്തകൾ. അത്രയധികം വരുമാനം അവക്കാഡോയിൽ നിന്നുണ്ട്, എറണാകുളം-ഇടുക്കി ജില്ലകളുടെ അതിർത്തി പ്രദേശമായ കല്ലൂർക്കാടിനടുത്ത് കലൂരിലുള്ള ഷാജി കൊച്ചുകുടിയെന്ന പഴവർഗ കർഷകന്റെ വാക്കുകളിൽ നിറയെ അവക്കാഡോ പ്രതീക്ഷകൾ.

പത്തേക്കറിലാണ് ഷാജിയുടെ അവക്കാഡോ കൃഷി. 2019ൽ നാടൻ ഇനങ്ങൾ പരീക്ഷിച്ചാണ് തുടക്കം. അവയെല്ലാം ഉൽപാദനത്തിലെത്തുകയും ചെയ്തു. എന്നാൽ അവക്കാഡോ വാണിജ്യാടിസ്ഥാനത്തിൽ കൃഷി ചെയ്യുമ്പോൾ ആഗോള വിപണിക്കു യോജിച്ച ഇനങ്ങൾ കണ്ടെത്തണമെന്നു ഷാജി.