ആകാശത്തട്ടുകളിൽ ആറിരട്ടി കൃഷി

മൂന്ന് ഏക്കറിൽ ചെയ്യാവുന്നത്ര മഞ്ഞൾകൃഷി വെറും അരയേക്കറിൽ

- ജയരാജ് മാതമംഗലം

 അരയേക്കറിൽ 3 ഏക്കറിലെ മഞ്ഞൾ കൃഷി നടത്താവു ന്ന മാതൃകയുമായി കർഷക ദമ്പതികൾ. പോളിഹൗസിനുള്ളിൽ തട്ടുകളിലായുള്ള വെർട്ടിക്കൽ ഫാമിൽ മഞ്ഞൾ കൃഷിചെയ്യുന്നത് കണ്ണൂർ കടന്നപ്പള്ളി-പാണപ്പുഴ പഞ്ചായത്തിലെ ബക്കളത്തുള്ള പി. അബൂബക്കറും ഭാര്യ കുഞ്ഞാമിനയുമാണ്. പ്രവാസികളായിരുന്ന ഇവർ നാട്ടിലേക്കു മടങ്ങിയപ്പോൾ തന്നെ വെർട്ടിക്കൽ മഞ്ഞൾ ഫാം തുടങ്ങാനുള്ള ആലോചനയിലായിരുന്നു. ഗൾഫിലെ പരിചയക്കാരും ബന്ധുക്കളുമായ പലരും മഹാരാഷ്ട്രയിൽ ഇത്തരം ഫാമുകൾ നടത്തുന്നതായി കേട്ടറിഞ്ഞതാണ് ചോദനമായത്. പരിമിതമായ സ്ഥലത്തു നിന്നു സാങ്കേതികവിദ്യയുടെ സഹായത്തോടെ ഗുണനിലവാരമേറിയ മഞ്ഞൾ ഉൽപാദിപ്പിച്ചാൽ മരുന്നുകമ്പനികളും മറ്റും വാങ്ങുമെന്നു കൂടി അറിഞ്ഞതോടെ ആത്മവിശ്വാസമായി.