കുഞ്ഞൻ നായക്കളുടെ കൂട്ടുകാരൻ

കുഞ്ഞൻ നായ്ക്കളുടെ പ്രജനനം ജോജോയ്ക്ക് ലാഭവഴി

അഞ്ചു വർഷം മുൻപ് ഒരു കുഞ്ഞൻ പഗ്ഗിനെ വാങ്ങുമ്പോൾ പാലാ എലിവാലിയിലെ ടോജോയുടെ മനസ്സ് നിറയെ കൗതുകവും നായ് പ്രേമവും മാത്രമാണുണ്ടായിരുന്നത്. ഇന്ന് ഇരുപതോളം കുഞ്ഞൻ നായ്ക്കൾ ഈ യുവാവിന് തരക്കേടില്ലാത്ത വരുമാനവഴി കൂടിയാണ്. 10 സ്പിറ്റ്സ്, ഒരു പോമറേനിയൻ, ഡാഷ്ഹണ്ട്, 3 പഗ്, ഓരോന്നു വീതം ബീഗിൾ, ലാബ്രഡോർ, അമേരിക്കൻ ബുള്ളി, ഇംഗ്ലിഷ് ബുൾഡോഗ് എന്നിങ്ങനെയാണ് ടോജോയുടെ നായ് ശേഖരം.

രണ്ട് കാരണങ്ങളാലാണ് കുഞ്ഞൻ നായ്ക്കളുടെ പ്രജനനത്തിൽ ശ്രദ്ധിക്കുന്നതെന്ന് ടോജോ പറഞ്ഞു. കുറഞ്ഞ മുതൽമുടക്ക്: കെന്നൽ ക്ലബ് റജിസ്ട്രേഷനുള്ള നായ്ക്കളെപ്പോലും 10,000-15,000 രൂപയ്ക്കു ലഭിക്കും. അതുകൊണ്ടുതന്നെ നഷ്ടസാധ്യത കുറവ്.

സാധാരണക്കാർക്കിടയിൽ കൂടുതൽ വിപണനസാധ്യത: വില കുറവായതുകൊണ്ടും തീറ്റ, സ്ഥലം എന്നിവ കുറഞ്ഞ തോതിൽ മതിയെന്നതിനാലും ഇവയോട് സാധാരണക്കാർക്കും താൽപര്യം.