കൃഷി എളുപ്പമാക്കാൻ ഓട്ടമേഷൻ

ഹൈടെക് കൃഷി പരീക്ഷണങ്ങൾക്കൊപ്പം ഓട്ടമേഷനും

ഹൈഡ്രോപോണിക്സ്, അക്വാപോണിക്സ്, എയ്റോപോണിക്സ്, ഓട്ടമേഷൻ, ഹെർബൽ ടീ, പായൽകൃഷി, മിസ്റ്റ് ഇറിഗേഷൻ എറണാകുളം പൂതൃക്കയിലെ പി.ജി. വേണുഗോപാലിന്റെ കൃഷിയിടത്തിൽ എന്നും പുത്തനാശയങ്ങളുടെ വിളവെടുപ്പാണ്.

ആറു വർഷം മുൻപ് 6 ഗ്രോബാഗുമായി കൃഷി തുടങ്ങിയതാണ് വേണു. ഗൾഫിൽ നിന്നു തിരിച്ചെത്തിയ എൻജിനീയർക്ക് മുറ്റത്തെ കൂടകളിൽ ഫ്രഷ് പച്ചക്കറിയുണ്ടാകുന്നത് അന്നു പുതുമയും ആവേശവുമായിരുന്നു. കൃഷി വിപുലമായതോടെ തലവേദനകൾ പലതുണ്ടായി. സൗകര്യപ്രദമായി കൃഷി ചെയ്യാൻ നമ്മുടെ നാട്ടിൽ സാഹചര്യമില്ലെന്നു മനസ്സിലായ അന്ന് ആരംഭിച്ചതാണ് സാങ്കേതികവിദ്യയുടെ സഹായത്തോടെ കൃഷി സൗകര്യപ്രദമാക്കാനുള്ള ശ്രമം. ഇൻഡസ്ട്രിയൽ അഗ്രിക്കൾച്ചറിന്റെ ആശയങ്ങൾ നമ്മുടെ വീട്ടുവളപ്പുകളിലും സാധ്യമാക്കാനുള്ള ശ്രമത്തിൽ കൂട്ടായത് ശാസ്ത്രബോധവും സാങ്കേതിക വിദഗ്ധന്റെ കരവിരുതും. തന്റെ കാർഷിക പരീക്ഷണങ്ങളെല്ലാം സാമൂഹിക പ്രതിബദ്ധതയുടെ ഭാഗമാണെന്നു വേണു പറയുന്നു. കാർഷികമേഖലയിലെ വിവിധ പ്രശ്നങ്ങൾക്കു പരിഹാരം അവതരിപ്പിക്കുന്നതിലൂടെ വരും തലമുറയെ ഈ രംഗത്ത് ഉറപ്പിച്ചു നിർത്താമെന്ന് അദ്ദേഹം പ്രതീക്ഷിക്കുന്നു.