മട്ടുപ്പാവിൽ പായൽകൃഷി

പോഷകസമ്പന്നമായ സ്പിരുലിന പായൽ കൃഷിചെയ്തു തുടങ്ങുകയാണ് എറണാകുളം പുത്തൻകുരിശിലെ പി.ജി. വേണുഗോപാൽ

സ്‌പിരുലിന എന്ന പായലിനെ ലോകം പോഷക വസ്തുവായി അംഗീകരിച്ചിട്ടു വർഷങ്ങളേറെയായി. അയൽസംസ്ഥാനമായ തമിഴ്നാട്ടിൽ ഒട്ടേറെ സ്പിരുലിന കർഷകരുണ്ട്. ഏറെയും ചെറുകിടക്കാർ. വിവിധ ന്യൂട്രസ്യൂട്ടിക്കൽ കമ്പനികൾക്കു സ്പിരുലിന ഉൽപാദിപ്പിച്ചു നൽകി അവർ വരുമാനം കണ്ടെത്തുന്നു. എന്നാൽ കേരളത്തിൽ മാത്രം സ്പിരുലിന സംരംഭങ്ങളുണ്ടായില്ല. ഈ സ്ഥിതി മാറുകയാണ്. എറണാകുളം പുത്തൻകുരിശിലെ പി.ജി. വേണുഗോപാലാണ് ഈ രംഗത്തു കേരളത്തിലെ ആദ്യ വാണിജ്യ സംരംഭകൻ

സ്പിരുലിനയുടെ ഗുണഗണങ്ങൾ കേട്ടറിഞ്ഞ വേണു  കൂടുതലറിയാൻ അന്വേഷിച്ചെത്തിയത് തമിഴ്നാട് ഈറോഡിലെ ഒരു സ്ഥാപനത്തിൽ. അവിടെ നിന്നു പ്രായോഗിക പരിശീലനം പൂർത്തിയാക്കിയശേഷം മദർ കൾചറുമായി വീട്ടിലെത്തിയ വേണു വീടും പരിസരവുമാകെ സ്പിരുലിന ബെഡുകൾ കൊണ്ടു നിറച്ചു. കൂടുതൽ മദർ കൾചറുണ്ടാക്കി വാണിജ്യോൽപാദനം തുടങ്ങുകയായിരുന്നു ലക്ഷ്യം. എന്നാൽ, അപ്രതീക്ഷിതമായി വന്ന പെരുമഴയിൽ സ്വപ്നങ്ങൾ നനഞ്ഞു. തുറസ്സിടങ്ങളിൽ സൂക്ഷിച്ചിരുന്ന നൂറുകണക്കിനു സ്പിരുലിന ബെഡുകൾ മഴയിൽ നശിച്ചു.