തനുരക്ഷയ്ക്കു ധനുഭക്ഷണം

നടുതലകളുടെ രുചിവൈവിധ്യം

- എഴുമാവിൽ രവീന്ദ്രനാഥ്

ശീതം തഴയ്ക്കുന്ന ശ്രീ ധനുമാസം എന്നാണല്ലോ വിശേഷണം. തണുത്തു വിറയ്ക്കുന്ന രാവുകളും പുകമഞ്ഞു പടരുന്ന പ്രഭാതങ്ങളും കൊടും ചൂടുള്ള പകലുകളുമാണ് ധനുവിന്റെ കയ്യിലിരുപ്പ്. മലയാളക്കരയ്ക്കു സമൃദ്ധിയുടെയും കരുതലിന്റെയും കാലം.

ഗ്രാമങ്ങളിൽ പശുക്കളുടെ പ്രസവകാലം കൂടിയാണ് ധനുമാസം. കാടൻ തൈര് അയൽക്കാർക്കു സൗജന്യമായി വിതരണം ചെയ്ത് കസ്റ്റമേഴ്സിനെ ഉറപ്പാക്കുന്നത് ഗ്രാമകേരളത്തിലെ സമ്പ്രദായമായിരുന്നു. കറന്നെടുത്ത പാൽ കാച്ചിയെടുക്കാതെ (തിളപ്പിച്ച് ആറിക്കാതെ) ഉറയൊഴിക്കുന്നതാണ് കാടൻ തൈര്. പ്രസവശേഷം ആദ്യ ദിനങ്ങളിലെ പാലാണ് ഇങ്ങനെ കാടൻ തൈരാക്കുന്നത്. പകൽ ചൂടിനെ നേരിടാൻ ഇതിനോളം പറ്റിയ മറ്റൊരു പാനീയമില്ല. മോരിൽ ഇഞ്ചിയും പച്ചമുളകും ഉപ്പും ചേർത്തു ണ്ടാക്കുന്ന സംഭാരവും തൈരിൽ കൽക്കണ്ടം പൊടിച്ചു ചേർക്കുന്ന മധുരരും കാടനു പിന്നാലെയുണ്ട് കേട്ടോ.