ക്ലാസിലും കൃഷിയിലും നൂറുമേനി

വിരമിച്ച ശേഷം കൃഷിയിലിറങ്ങിയ അധ്യാപകൻ

- സുരേഷ് കുമാർ

ജന്തുശാസ്ത്രമാണ് രമേശൻ മാഷ് കോളജിൽ പഠിപ്പിച്ചിരുന്നതെങ്കിലും വിരമിച്ചശേഷം സസ്യശാസ്ത്ര ത്തോടാണ് പ്രതിപത്തി. ബട്ടർനട്ട്, ചുരയ്ക്ക, കുക്കുമ്പർ എന്നിങ്ങനെ വിദേശിയും സ്വദേശിയുമായ ഒട്ടേറെ പച്ചക്കറികൾ വിളയുന്നു മാഷിന്റെ കൃഷിയിടത്തിൽ. വിളകൾ പലതുണ്ടെങ്കിലും നമ്മുടെ നാട്ടിൽ ഇനിയും അത് പ്രചാരത്തിലാകാത്ത ബട്ടർനട്ട് കൃഷിയിലാണ് എറണാകുളം പറവൂർ വടക്കുംപുറം തുണ്ടിയിൽ വീട്ടിൽ പ്രഫ. ടി.കെ.രമേശൻ ഇപ്പോൾ കൂടുതൽ ശ്രദ്ധിക്കുന്നത്.

ബട്ടർനട്ട് കേരളത്തിൽ അത്ര പരിചിതമല്ലാത്തതു കൊണ്ട് അതിന്റെ സാധ്യതകൾ പരിശോധിച്ചുതന്നെയാണ് കൃഷി ആരംഭിച്ചതെന്നു മാഷ്. മത്തങ്ങ കുടുംബത്തിൽപെട്ട ബട്ടർനട്ടിന് മത്തങ്ങയുടെ തന്നെ രുചിയാണുള്ളത്. അത്രയും തൂക്കമില്ല എന്നുമാത്രം. സ്ക്വാഷ്, ജ്യൂസ്, ഷെയ്ക്ക്, അച്ചാർ എന്നിവയുണ്ടാക്കാൻ ഉത്തമം.