മരത്തിന് അമരത്വം നൽകാൻ അനീഷ്

പ്രായമായ മരങ്ങളുടെ യൗവനം വീണ്ടെടുക്കുന്ന ദൗത്യവുമായി പൊന്നാനിയിലെ അനീഷ്

സിബിഐ അഡീഷനൽ എസ്പി ആയി വിരമിച്ച ബക്കറുടെ വീട്ടുവളപ്പിലെ കോമാവ് അദ്ദേഹത്തിന് ഏറെ പ്രിയപ്പെട്ടതാണ്. ഉമ്മയുടെ സ്നേഹവും ഓർമയുമാണ് അദ്ദേഹത്തിന് അതിലെ മാമ്പഴങ്ങൾ. എന്നാൽ, ഇത്തിൾ ക്കണ്ണിയും മറ്റും വളർന്ന് മാവിന്റെ ആരോഗ്യം ക്ഷയിച്ചത് അദ്ദേഹത്തെ വിഷമിപ്പിച്ചു. വീടിനടുത്ത് ഉയരത്തിൽ വളർന്നു നിന്ന മാവിന്റെ തടിയിൽ കേടു കണ്ടതോടെ ആശങ്ക യുമായി. ഉമ്മയുടെ സ്നേഹസ്മരണയുണർത്തുന്ന മാവ് വെട്ടിക്കളയാൻ വയ്യ. അതേസമയം, മാവ് വീടിനു ഭീഷണിയാവാതെ നോക്കുകയും വേണം. അപ്പോഴാണ് പൊന്നാനി നെല്ലിക്കൽ നഴ്സറി ഉടമ അനീഷ് തുണയ്ക്കെത്തിയത്. പുനർയൗവന പ്രക്രിയയിലൂടെ കോമാവിന്റെ ആരോഗ്യം വീണ്ടെടുക്കാമെന്ന് അനീഷ് ഉറപ്പു നൽകിയതോടെ അബൂബക്കറിന് ആശ്വാസമായി. മാവിന്റെ ഉയരം കുറച്ചും കേടു ബാധിച്ചതും അധികമുളളതുമായ ശിഖരങ്ങൾ മുറിച്ചുനീക്കിയും വളങ്ങളും മറ്റും നൽകിയും കോമാവിനെ യുവസുന്ദരിയാക്കാൻ അനീഷിന് ഏതാനും മാസങ്ങളേ വേണ്ടിവന്നുള്ളൂ.