മുടങ്ങാതെ മുട്ട നിലയ്ക്കാത്ത വരുമാനം

ബിവി 380 കോഴികളിലൂടെ വർഷം മുഴുവൻ ആദായം

ആലപ്പുഴ താമരക്കുളം ശാന്തിഭവനിലെ എം. രാമകൃഷ്ണന്റെ പത്തേക്കർ ഭൂമി നിറയെ വാഴയും പച്ചക്കറികളും ഫലവൃക്ഷങ്ങളുമാണ്. കുടുംബസ്വത്തായി ലഭിച്ച റബർതോട്ടത്തെ ഭക്ഷ്യവിഭവങ്ങളുടെ കലവറയാക്കിയ രാമകൃഷ്ണനു ലാഭത്തിലുപരി നിലവാരമുള്ള ഭക്ഷ്യോൽപന്നങ്ങൾ നാട്ടുകാർക്ക് നൽകാനാണ് താൽപര്യം. അതാണ് ഗ്രാമീൺ അഗ്രോ ഫാംസിന്റെ പ്രധാന ലക്ഷ്യവും.

ഫാമിലെ സ്ഥിരവരുമാനസ്രോതസ്സിലൊന്ന് മുട്ടക്കോഴികളാണ്. പോഷകസുരക്ഷയ്ക്കൊപ്പം സാമ്പത്തിക സുരക്ഷയും നൽകാൻ അവയ്ക്കു കഴിയുമെന്ന തിരിച്ചറിവാണ് രാമകൃഷ്ണനെ പൗൾട്രിയിലേക്ക് ആകർഷിച്ചത്. പഴംപച്ചക്കറികൾക്കൊപ്പം നല്ല കോഴിമുട്ട കൂടി ലഭ്യമാക്കുന്നത് ഉചിതമായിരിക്കുമെന്ന് വേണാട് പൗൾട്രി ഫാർമേഴ് കമ്പനി ചെയർമാൻ ഡോ. ചന്ദ്രപ്രസാദാണ് രാമകൃഷ്ണ നോടു പറഞ്ഞത്. കൂടും കോഴികളും സാങ്കേതികോപദേശങ്ങളും അദ്ദേഹം നൽകുകയും ചെയ്തു.