വെറും കോഴിയല്ല കരിങ്കോഴി

കരിങ്കോഴിക്കുഞ്ഞുങ്ങളെ ഉൽപാദിപ്പിച്ച് മികച്ച വരുമാനം

- ഐജോ

ചർമവും തൂവലും മാത്രമല്ല, ഇറച്ചിയും കറുപ്പാണന്നതാണ് മധ്യപ്രദേശിലെ തനത് കോഴിയിനമായ കടക്നാഥിന്റെ സവിശേഷത. കേരളത്തിലെ കരിങ്കോഴി, മധ്യപ്രദേശിലെ ജാബുവ മേഖലയിലെ ആദിവാസികൾക്ക് കാലാമാസിയാണ്. ഇതിനെപ്പോലെ പൂർണമായും കറുപ്പു ചാലിച്ച് മറ്റൊരു കോഴിയിനമില്ല.

കറുപ്പുനിറം മാത്രമല്ല, മറ്റു കോഴിയിനങ്ങളെ അപേക്ഷിച്ച് മാംസ്യത്തിന്റെ അളവ് കൂടുതലായ തും കൊഴുപ്പ് കുറവായതുമൊക്കെ ഇവയുടെ മാംസം ആരോഗ്യഭക്ഷണമായും മരുന്നു നിർമാണത്തിലെ ചേരുവയായും ഉപയോഗിക്കാൻ കാരണമാണ്.

കടക്നാഥിനു 2018ൽ ഭൗമസൂചികാ പദവി ലഭിച്ചു. ഛത്തീസ്ഗഡുമായി നീണ്ടനാളത്തെ നിയമപോരാട്ടങ്ങൾക്കൊടുവിലാണ് മധ്യപ്രദേശ് ഈ പദവി നേടിയെടുത്തത്. ആദിവാസി മേഖലയായ ജാബുവയിൽ കരിങ്കോഴികളുടെ ഉന്നമനത്തിനായി കൃഷി വിജ്ഞാനകേന്ദ്രത്തിന്റെ സഹായത്തോടെ ഒട്ടേറെ ഫാമുകൾ പ്രവർത്തിക്കുന്നുണ്ട്. തീർന്നില്ല വിശേഷം. ക്രിക്കറ്റ് താരം മഹേന്ദ്ര സിങ് ധോണി തന്റെ 43 ഏക്കർ ഓർഗാനിക് ഫാമിലേക്ക് 2000 കടക്നാഥ് കോഴികളെ വാങ്ങിയത് മുൻപു വാർത്തയായിരുന്നു.