ഇതാണെന്റെ റിയൽ ലൈഫ്

കൃഷിയിലേക്കു വന്നതോടെ ആരോഗ്യപ്രശ്നങ്ങൾ മാറി, ഉത്സാഹം നിറഞ്ഞു

- ജോബി ജോസഫ് തോട്ടുങ്കൽ

ഇരുപതോ മുപ്പതോ വർഷമല്ല, 44 വർഷമാണ് ജയിംസ് ബാങ്ക്ജോലിയിൽ 16-ാം വയസ്സിൽ ഫെഡറൽ ബാങ്കിൽ ചേർന്ന തൃശൂർ ആമ്പല്ലൂർ മണ്ണംപേട്ട സ്വദേശി ജയിംസ് പറപ്പുള്ളി പക്ഷേ ഈ 44 വർഷവും ബാങ്ക് ഉദ്യോഗസ്ഥൻ എന്നപോലെ കൃഷിപ്രേമിയുമായി രുന്നു. അതുകൊണ്ടുതന്നെ ഉദ്യോഗത്തിൽനിന്നു കൃഷിയിലേക്കുള്ള മാറ്റം ജയിംസിന് സുരക്ഷിതവും സുഖകരവുമായ സോഫ്റ്റ് ലാൻഡിങ്' ആയിരുന്നു. റിട്ടയർമെന്റിനു ശേഷമാണ് റിയൽ ലൈഫ്' തുടങ്ങുന്നതെന്നാണ് ജയിംസിന്റെ പക്ഷം. ഉത്തരവാദിത്തങ്ങളുടെയും തിരക്കുകളുടെയും ഇടയിൽ ജീവിതത്തിൽ "മിസ്' ചെയ്ത ചില ഇഷ്ടങ്ങൾ എല്ലാവർക്കുമുണ്ടാകും. അവയെ തിരികെപ്പിടിക്കാനുള്ള സമയമാണ് റിട്ടയർമെന്റ് കാലം. തനിക്ക് ഏറ്റവും "മിസ് ചെയ്തത് കൃഷി തന്നെയെന്നും ജയിംസ്.

വേറിട്ട കൃഷിപരീക്ഷണങ്ങളോടു പണ്ടേയുണ്ടു കമ്പം. ജാപ്പനീസ് കൃഷിചിന്തകൻ മസനോബു ഫുക്കുവോക്കയെയും അദ്ദേഹത്തിന്റെ ഒറ്റവൈക്കോൽ വിപ്ലവ (One-Straw Revolution) ത്തെയും കേരളത്തിൽ ആദ്യം പരിചയപ്പെട്ടവരിൽ ജയിംസുമുണ്ട്. One-Straw Revolution മലയാളത്തിലേക്കു വിവർത്തനം ചെയ്യാനുള്ള ശ്രമങ്ങൾക്കൊപ്പവും ജയിംസുണ്ടായിരുന്നു. ഇതര സംസ്ഥാനങ്ങളിലേക്കു സ്ഥലംമാറ്റങ്ങൾ വന്നതോടെ കൃഷിയിലെ ഇടപെടൽ കുറഞ്ഞു.

എങ്കിലും ബാങ്കിങ്ങിന്റെ വൈരസ്യം മാറ്റാൻ കൃഷിയെ മനസ്സിൽ ചേർത്തുപിടിച്ചു. 3 വർഷം മുൻപു വിരമിച്ചതോടെ കൃഷി വീണ്ടും മനസ്സിൽനിന്നു മണ്ണിലെത്തി. പാലക്കാട് ശ്രീകൃഷ്ണപുരത്തെ കൃഷിക്കൂട്ടായ്മയായ 'സബിൾ ഫുഡ് ഫോറസ്റ്റ് ഫാമിങ്' ആണ് ഇക്കുറി ആകർഷിച്ചത്. അവരുടെ ആശയങ്ങൾ സ്വീകരിച്ച് ജയിംസ് ഒരുക്കിയ "ഭക്ഷ്യവനം' ആരെയും മോഹിപ്പിക്കും.

മധുരത്തോട്ടം