ചാംപ്യന്മാരുടെ പരിശീലകൻ

പഗ് നായ്ക്കളെ വളർത്തുന്നതിനൊപ്പം അവയുടെ കുട്ടികളെ ഡോഗ് ഷോകളിൽ പങ്കെടുപ്പിക്കുന്ന യുവാവ്

- ഐബിൻ

ഒരു കൊച്ചു ബാലനെ എങ്ങും എപ്പോഴും പിന്തുടർന്നിരുന്ന ഇത്തിരിക്കുഞ്ഞൻ നായ! ഹച്ച് എന്ന മൊബൈൽ ഫോൺ നെറ്റ്വർക്ക് കമ്പനിയുടെ ആ പഴയ പരസ്യമാണ് പഗ് എന്ന നായ ഇനത്തെ മലയാളികൾക്കു പ്രിയങ്കരമാക്കിയത്. കേവലം ഒരടിയോളം ഉയരം, 6-9 കിലോ ഭാരം, ഉറച്ച ശരീരം, നീളം കുറഞ്ഞ രോമം, ചാര ക്രീം/ കറുപ്പ് നിറങ്ങൾ, ചപ്പിയ മുഖത്ത് ആഴത്തിലുള്ള ചുളിവുകൾ, കുറുകിയതും നേരെയുള്ളതുമായ മുതുക്, നന്നായി ചുരുണ്ട് ഇടുപ്പിനു മുകളിലിരിക്കുന്ന വാൽ, നിവർന്ന് ഉറപ്പുള്ള കാലുകൾ. തുറിച്ച ഉണ്ടക്കണ്ണുകളിലെ ദൈന്യഭാവം നമ്മുടെ ഹൃദയത്തെ തൊടും.

കേരളത്തിൽ ഹച്ചിന്റെയും ഹച്ച് നായയുടെയും പരസ്യം പ്രചാരത്തിലാകും മുൻപുതന്നെ പഗിനെ കണ്ട് ഇഷ്ടപ്പെട്ടു സ്വന്തമാക്കിയ ശ്വാനപ്രേമിയാണ് ആലപ്പുഴ ഹരിപ്പാട് കാർത്തികപ്പള്ളി സിബി വർഗീസ് വല്യത്ത്. ഒരു സുഹൃത്തിന്റെ വീട്ടിൽച്ചെന്നപ്പോഴായിരുന്നു ആദ്യമായി പഗിനെ കണ്ടത്, 2006ൽ. ആദ്യ കാഴ്ചയിൽത്തന്നെ ഇഷ്ടപ്പെട്ടു.