അവർ സന്തുഷ്ടരാണ്

വെല്ലത്തുരു ഗ്രാമത്തിൽ നെല്ലും പച്ചക്കറികളും കൃഷി ചെയ്യുന്ന പ്രകൃതി കർഷകരുടെ അനുഭവങ്ങൾ

വർഷങ്ങൾക്കു മുൻപ് മഹാരാഷ്ട്രക്കാരനായ സുഭാഷ് പലേക്കർ കേരളത്തിലെത്തി പ്രചരിപ്പിച്ച പ്രകൃതി കൃഷി, അതിനു മുൻപ് ജപ്പാൻകാരൻ ഫുക്കുവോക്കയി ലൂടെ നാം കേട്ടറിഞ്ഞ പ്രകൃതികൃഷി ഇരുപത്തൊന്നാം നൂറ്റാണ്ടിൽ ഡിജിറ്റൽ കൃഷിക്കും സ്മാർട് കൃഷിക്കുമൊപ്പം വാഴുന്നതെങ്ങനെ? ഈ കൃഷിരീതി പഠിക്കാനായി വിദേശ രാജ്യങ്ങളിലെ പ്രതിനിധികൾ ആന്ധ്രയിലെത്തിയത് എന്തു കൊണ്ട്? ആന്ധ്രപ്രദേശിലെ കർഷകർക്ക് പ്രകൃതികൃഷി സ്വീകാര്യമായതിനു കാരണമെന്ത് തുടങ്ങിയ ചോദ്യങ്ങളുമായി ആദ്യം പോയത് ബപട്ലാ ജില്ലയിലെ കൃഷിയിടങ്ങളിലേക്കാണ്.

വെല്ലത്തുരു, ഇല്ലവാരം ഗ്രാമങ്ങളിലെ കർഷകരെയാണ് പ്രധാനമായും കണ്ടത്. വെല്ലത്തുരുവിൽ കൃഷി വകുപ്പ് അസിസ്റ്റന്റ് ഡയറക്ടറും ജില്ലാ പ്രോജക്ട് മാനേജരുമായ വി. വാണി ശ്രീയുടെ നേതൃത്വത്തിൽ പ്രകൃതികൃഷി പരിശീലനം നടന്നുവരികയായിരുന്നു. അത്തപ്പൂക്കളം പോലെ നിലത്തൊരുക്കിയ ചാർട്ടിൽ ചൂണ്ടി പ്രകൃതികൃഷിയുടെ അടിസ്ഥാനതത്വങ്ങൾ അവർ വിശദീകരിച്ചു. തുടർന്ന് ജീവാമൃതം, ഘനജീവാമൃതം, ബീജാമൃതം, ഫിഷ് അമിനോ ആസിഡ്, എഗ് അമിനോ ആസിഡ് എന്നിവയുടെ നിർമാണ രീതികൾ സ്വാശ്രയസംഘാംഗങ്ങളായ വനിതകൾ ചെയ്തു കാണിച്ചു. എന്തുകൊണ്ടാണ് പ്രകൃതികൃഷി ഇഷ്ടപ്പെടുന്നതെന്ന ചോദ്യത്തിന് എല്ലാവർക്കും ഒരുത്തരം മാത്രംകൃഷിച്ചെലവ് കുത്തനെ കുറയുന്നു, നഷ്ടസാധ്യത കുറയുന്നു.