કોમનવેલ્થ ગેઇમ્સ

કોમનવેલ્થ ગેઇમ્સમાં મેડલ્સ મેળવી દેશ અને રાજ્યનું નામ રોશન કરનારા ગુજરાતના ખેલાડીઓને કુલ 80 લાખ રૂપિયાના ખેલ પ્રતિભા પુરસ્કાર એનાયત કરતા મુખ્યમંત્રી શ્રી ભૂપેન્દ્ર પટેલ

> રમત-ગમત, યુવા અને સાંસ્કૃતિક બાબતોના મંત્રી શ્રી હર્ષ સંઘવીની વિશેષ ઉપસ્થિતિ

મુખ્યમંત્રીશ્રી

> વડાપ્રધાન શ્રી નરેન્દ્રભાઇ મોદીના દિશાદર્શનમાં આપણો દેશ હરેક ક્ષેત્રેવિશ્વમાં આગળવધ્યો છે

> રમત-ગમત પ્રત્યે જોવાની લોકોની દ્રષ્ટિમાં પરિવર્તન આવ્યુંછે

> રાજ્ય સરકાર ખેલાડીઓને પ્રોત્સાહન અને અધતન સુવિધાઓ આપી ઉત્કૃષ્ટ દેખાવ માટે સતત તેમની પડખે ઊભી છે

મુખ્યમંત્રી શ્રી ભૂપેન્દ્ર પટેલે કોમનવેલ્થ ગેઇમ્સ-૨૦૨૨ માં વિવિધ રમતોમાં મેડલ્સ પ્રાપ્ત કરી ભારત અને ગુજરાતનું વિશ્વમાં ગૌરવ વધારનારા ખેલાડીઓને ગાંધીનગરમાં કુલ ૮૦ લાખ રૂપિયાના ખેલ પ્રતિભા પુરસ્કાર અર્પણ કરી સન્માનિત કર્યા હતા.

રાજ્ય સરકારના રમત-ગમત, યુવા અને સાંસ્કૃતિક બાબતોના વિભાગ દ્વારા ગાંધીનગરમાં આ વિજેતા ખેલાડીઓના સન્માનનો ગૌરવશાળી સમારોહ રાજ્ય મંત્રી શ્રી હર્ષ સંઘવીની ઉપસ્થિતિમાં યોજવામાં આવ્યો હતો.

મુખ્યમંત્રીશ્રી અને રાજ્ય મંત્રીશ્રીએ કોમનવેલ્થ ગેઇમ્સ-૨૦૨૨માં ટેબલ ટેનિસ રમતમાં ટિમ ઇવેન્ટમાં ગોલ્ડ મેડલ વિનર ગુજરાતના ખેલાડી હરમિત દેસાઇને રૂ. ૩૫ લાખનો ખેલ પ્રતિભા પુરસ્કાર એનાયત કર્યો હતો.

મુખ્યમંત્રી શ્રી ભૂપેન્દ્ર પટેલ અને રાજ્ય મંત્રી શ્રી હર્ષ સંઘવીએ પેરા ટેબલ ટેનિસમાં સિંગલ ઇવેન્ટમાં ગોલ્ડ મેડલ પ્રાપ્ત ભાવિના પટેલને રૂ. ૨૫ લાખ, બ્રોન્ઝ મેડલ પ્રાપ્ત દિવ્યાંગ ખેલાડી સોનલ પટેલને રૂ. ૧૦ લાખની પુરસ્કાર રાષિના ચેક અર્પણ કર્યા હતા.