വീട് ഭാഗ്യം കൊണ്ടു വരും

നടിയും നേര് സിനിമയുടെ തിരക്കഥാകൃത്തുമായ അഡ്വ. ശാന്തി മായാദേവി ഇന്റീരിയറിനെക്കുറിച്ചുള്ള സങ്കൽപങ്ങൾ പങ്കുവയ്ക്കുന്നു

- തയാറാക്കിയത്: സിനു കെ. ചെറിയാൻ

നമ്മളെ കരുതുന്ന മനുഷ്യരെപ്പോലെയാകണം വീട് എന്നാണ് എന്റെ ആഗ്രഹം. നമ്മുടെ ഇഷ്ടങ്ങളും ഇഷ്ടക്കേടുകളും അറിഞ്ഞു പെരുമാറാൻ വീടിനു കഴിയണം. സൂര്യരശ്മികൾ കണ്ട്, ശുദ്ധവായു ശ്വസിച്ച് പോസീറ്റീവ് എനർജിയോടെ ഉണരുന്നതാണ് എനിക്കിഷ്ടം. അമ്പലത്തിൽ നിന്നുള്ള "കൗസല്യാ സുപ്രജാ കീർത്തനം കേൾക്കാനായാൽ സന്തോഷം ഇരട്ടിക്കും. കുട്ടിക്കാലം മുതലുള്ള ശീലമാണിത്.

നല്ലതുപോലെ കാറ്റും വെളിച്ചവും കടക്കുന്ന രീതിയിലാണ് ഞങ്ങളുടെ വീട്ടിലെ കിടപ്പുമുറി. അടുത്ത് അമ്പലം ഇല്ലാത്തതിനാൽ രാവിലെ "സ്പോട്ടിഫൈ'യിൽ സുപ്രഭാതം വയ്ക്കും. വ്യായമം കഴിഞ്ഞ് രാവിലത്തെ ജോലികൾ ചെയ്യുമ്പോൾ പശ്ചാത്തലത്തിൽ കർണാടക സംഗീതം ഉണ്ടാകും. അന്തരീക്ഷത്തിന് ചന്ദനത്തിരിയുടെ സുഗന്ധവും.

വൈകുന്നേരം ജോലി കഴിഞ്ഞ് മടങ്ങി വന്നാൽ അൽപം റിലാക്സിങ് ആയ അന്തരീക്ഷമാണ് താൽപര്യം. വലിയ ബഹളങ്ങളൊന്നും അപ്പോൾ ഇഷ്ടമല്ല. തീവ്രതയേറിയ പ്രകാശം പോലും അപ്പോൾ അസ്വസ്ഥത സൃഷ്ടിക്കാം. ഡിം മോഡിലുള്ള ലൈറ്റാണ് സന്ധ്യകൾക്കിണങ്ങുക.

എന്തായാലും നമ്മുടെ മൂഡ് അനുസരിച്ച് പ്രതികരിക്കുന്ന വീടുകളോട് കൂട്ടുകൂടാനാണ് എനിക്കിഷ്ടം.

ഇവിടമാണ് പുതിയ ശാന്തിയെ രൂപപ്പെടുത്തിയത്