ഒഴിയാനാകില്ല ഓംബുഡ്സ്മാന് പരാതികൾക്ക് പരിഹാരം

ഓരോ ഓംബുഡ്സ്മാന്റെയും അധികാരപരിധി അന്വേഷിച്ച് സമയം കളയേണ്ട. ഇന്ത്യയിലെവിടെ നിന്നും ഒരൊറ്റ ഓംബുഡ്സ്മാൻ സംവിധാനം വഴി സാമ്പത്തിക പരാതിക്കു പരിഹാരം തേടാം.

- സി.എസ്. രഞ്ജിത്ത്

ഈ ഓംബുഡ്സ്മാന്റെ പരിധിയിൽ അല്ല നിങ്ങൾ താമസിക്കുന്നത്. ഇത്തരം സ്ഥാപനങ്ങളെക്കുറിച്ചുള്ള പരാതി മറ്റൊരു ഓംബുഡ്സ്മാനാണ് സമർപ്പിക്കേണ്ടത്, ഈ വിഷയം ഞങ്ങളുടെ അധികാരപരിധിയിൽ വരാത്തതിനാൽ പരിഗണിക്കാൻ ആകില്ല.

സാമ്പത്തിക പരാതികളുമായി ബാങ്കിങ് ഓംബുഡ്സ്മാനെ സമീപിക്കുന്നവരിൽ ഭൂരിപക്ഷവും കേൾക്കുന്ന സ്ഥിരം പല്ലവിയാണിത്. അതുകൊണ്ടു തന്നെ പലരും പരാതിയുമായി ഇത്തരം സംവിധാനങ്ങൾക്കു പിന്നാലെ പോകാറുമില്ല.

എന്നാൽ, ഇന്ന് സ്ഥിതിയാകെ മാറിയിരിക്കുന്നു. രാജ്യത്തെ സാമ്പത്തിക പരാതികൾ പരിഹരിക്കുന്നതിനുള്ള ഓംബുഡ്സ്മാൻ സംവിധാനം അടിമുടി പരിഷ്കരിച്ച് ഓൺലൈൻ സംവിധാനങ്ങളിലേക്കു ചുവടു മാറിക്കഴിഞ്ഞു. റിസർവ് ബാങ്ക് 2021 നവംബറിൽ കൊണ്ടുവന്ന സമഗ്ര ഓംബുഡ്സ്മാൻ പദ്ധതിക്ക് പ്രത്യേകതകൾ ഏറെയുണ്ട്.

പല വാതിലുകളിൽ മുട്ടേണ്ട

ബാങ്കുകൾക്കെതിരെയുള്ള പരാതികളേ തിരുവനന്തപുരത്ത് റിസർവ് ബാങ്കിൽ പ്രവർത്തിക്കുന്ന ബാങ്കിങ് ഓംബുഡ്സ്മാൻ ഏറ്റെടുത്തിരുന്നുള്ളൂ. ബാങ്കിതര ഫിനാൻസ് കമ്പനികൾക്കെതിരെയാണ് പരാതിയെങ്കിൽ മറ്റൊരു ഓംബുഡ്സ്മാനെ സമീപിക്കണമായിരുന്നു.

മൊബൈൽ പണമിടപാടുകൾ ഉൾപ്പെടെ ഡിജിറ്റൽ സേവനങ്ങളെക്കുറിച്ചാണെങ്കിൽ മൂന്നാമതൊരു ഓംബുഡ്സ്മാനായിരുന്നു അധികാരം.