કવેળા પ્યુબર્ટી પીરિયડ બની રહ્યો છે ચિંતાનો વિષય

વર્તમાન સમયમાં દીકરીઓમાં પ્યુબર્ટી પીરિયડ માતા-પિતા અને ડૉક્ટરો તેમ જ નિષ્ણાતોમાં ચર્ચાનો વિષય બની રહ્યો છે. ચર્ચા થવી પણ જોઈએ, કારણ કે મુદ્દો ગંભીર છે. મુદ્દો છે દીકરીઓમાં વહેલો શરૂ થઈ રહેલો પ્યુબર્ટી પીરિયડ. વહેલા પ્યુબર્ટી પીરિયડને કારણે દીકરીઓ અને માતા-પિતાએ શારીરિક-માનસિક ઉપરાંત સામાજિક દબાણનો શિકાર બનવું પડે છે. જેની આડઅસર દીકરીઓના ભવિષ્ય પર પડી રહી છે. પ્યુબર્ટી પીરિયડ એટલે શું, તેની નકારાત્મક અસરો અને આ પીરિયડ યોગ્ય સમયે જ શરૂ થાય તે માટે શું કરવું જોઈએ આવો જાણીએ.

પ્યુબર્ટી એટલે એવો સમયગાળો અથવા એ અવસ્થા, જેમાં બાળકો (બાળકીઓ)-તરુણો (તરુણીઓ)માં શારીરિક ફેરફાર જોવા મળે છે – અનુભવવા મળે છે. જે ઉંમરમાં આ બધા ફેરફારો થવાની શરૂઆત થાય તે ઉંમરને પ્યુબર્ટી પીરિયડની શરૂઆત માનવામાં આવે છે. આપણે ત્યાં સામાન્ય રીતે એવો ખ્યાલ પ્રવર્તે છે કે દીકરીઓમાં માસિક ચક્રનો પ્રારંભ થાય અને છોકરાઓમાં મૂછનો દોરો ફૂટે એટલે બાળકો યુવાનીમાં પ્રવેશ્યા. હકીકતે યુવાનીમાં પ્રવેશતાં પહેલાં છોકરા-છોકરીઓમાં કિશોરાવસ્થાને લગતાં ઘણાં શારીરિક અને માનસિક પરિવર્તનો થવા લાગે છે. વર્તમાન સમયમાં પ્યુબર્ટી પીરિયડ માતા-પિતા માટે ચિંતાનો વિષય બની રહ્યો છે. તેમાંય ખાસ કરીને દીકરીઓમાં વહેલા શરૂ થતો પ્યુબર્ટી પીરિયડ દીકરીઓની સાથે માતા-પિતાને પણ અચરજ, આશંકા અને અનિદ્રાનું કારણ બની રહ્યો છે. થોડાં વર્ષો પહેલાં છોકરીઓમાં પ્યુબર્ટી પીરિયડ ૮-૧૩ વર્ષ અને છોકરાઓમાં આ સમયગાળો ૧૦-૧૪ વર્ષની આસપાસ જોવા મળતો હતો. આજે હવે આ સમયગાળો દીકરીઓમાં ૬-૭ વર્ષની ઉંમરમાં શરૂ થઈ જતો જોવા મળી રહ્યો છે. પ્યુબર્ટીની શરૂઆતનાં લક્ષણોમાં સ્તનનો આકાર વધવો, પીરિયડ આવવા વગેરે છે. સાથે જ ચહેરા પર ખીલ થવા, બગલમાં વાળ આવવા વગેરે જેવાં લક્ષણો જોવા મળે છે. લોકોમાં એવી માન્યતા છે કે જ્યારે દીકરી માસિક ધર્મમાં બેસે એટલે પ્યુબર્ટી પીરિયડ શરૂ થાય. જોકે, આ ભ્રમ છે. પીરિયડમાં થવું તો પ્યુબર્ટી પીરિયડનું છેલ્લું લક્ષણ છે. એટલે કે પ્યુબર્ટીની શરૂઆત તો પીરિયડ શરૂ થાય તેના ઘણા સમય પહેલાંથી થઈ જતી હોય છે.