રાજ્યોના સરહદી વિવાદ નક્કર ઉકેલ માગે છે..

૧૯૫૦માં ભાષાવાર રાજ્ય રચના અનુસાર રાજ્યોનું નિર્માણ થયું ત્યારથી આ વિવાદ ચાલે છે

કર્ણાટક અને મહારાષ્ટ્ર વચ્ચેના સરહદી વિવાદમાં નજીવા કારણસર ભડકો થતાં રહી ગયો. મહારાષ્ટ્રના બે પ્રધાનોએ કર્ણાટકના બેલાગાવીની મુલાકાતને રદ કરતાં વિવાદને હાલ પૂરતો શાંત કરી શકાયો છે, પરંતુ તેને કારણે એ વિસ્તારમાં તંગદિલીનો માહોલ તો સર્જાઈ ગયો. એ વિસ્તારમાં પ્રતિબંધિત આદેશો લાગુ કરવામાં આવ્યા. વાહનવ્યવહાર ખોરવાયો અને વાતાવરણ પણ ખરાબ થયું.

બંને રાજ્યોની સરકારોએ અને સંગઠનોએ આ મુદ્દાને હવા આપવાનું કામ કર્યું હતું. આ બંને રાજ્યો વચ્ચેના સરહદી વિવાદ બહુ જૂના છે. બલ્કે, ૧૯૫૦માં ભાષાવાર રાજ્ય રચના અનુસાર રાજ્યોનું નિર્માણ થયું ત્યારથી આ વિવાદ ચાલે છે. જે વિસ્તારમાં એકથી વધુ ભાષા બોલાતી હોય, એવા વિસ્તારનો ક્યા રાજ્યમાં સમાવેશ કરવો, તે વિશે નિર્ણય ન થઈ શકે, ત્યારે આવી સ્થિતિ સર્જાય છે.