એક સમયે કોલકાતાથી લંડન વચ્ચે બસ દોડતી હતી!

કોલકાતાથી ચોતરફ હજારો બસો વિવિધ માર્ગો તરફ જતી, પણ હકીકત એ છે કે ગંગા તટથી થેમ્સના કિનારે લંડન સુધી જતી એકમાત્ર બસ હતી!

- મુકેશ ઠક્કર

આ હકીકત છે, વિશ્વની સૌથી લાંબા માર્ગનું અંતર કાપતી કોલકાતા - લંડન બસ સેવા હતી!

લંડન અને કોલકાતા વચ્ચે ખાસ્સું અંતર છે. નદીઓ, પહાડ, નહેરો અને મહાસાગર પાર કરીને પહોંચવાનું સાહસ એક સમયે થયું હતું!

કોલકાતાથી ચોતરફ હજારો બસો વિવિધ માર્ગો તરફ જતી, પણ હકીકત એ છે કે ગંગા તટથી થેમ્સના કિનારે લંડન સુધી જતી એકમાત્ર બસ હતી! કોલકાતાના ગંગા કિનારે બસોનો કાફલો ત્યારે પણ જોવા મળતો, કારણ કે જળમાર્ગ પણ મહત્ત્વપૂર્ણ હતું. આટલી બધી ભીડમાં પરદેશ લઈ જતી એક જ વ્યવસ્થા હતી તે આલ્બર્ટની અનોખી બસ!

જોકે તે અવિશ્વસનીય જેવું લાગે, પણ લંડનથી કોલકાતા અને કોલકાતાથી લંડન એક લક્ઝરી બસ સેવા ૧૯૫૦ના દાયકામાં શરૂ કરવામાં આવી હતી! લંડનથી કોલકાતા જતી આ બસને ‘આલ્બર્ટ’ નામ આપવામાં આવ્યું હતું. આ ‘આલ્બર્ટ ટૂર સર્વિસ’નું સાહસ હતું.

આલ્બર્ટે ૧૫ એપ્રિલ, ૧૯૫૭ના લંડનથી પોતાની યાત્રા શરૂ કરી હતી. લંડનથી પ્રથમ બસ ૫ જૂને કોલકાતા પહોંચી હતી. એટલે કે લગભગ ૫૦ દિવસની યાત્રા થઈ હતી!

બસ ઇંગ્લેન્ડથી બેલ્જિયમ અને ત્યાંથી પશ્ચિમ જર્મની, ઓસ્ટ્રિયા, યુગોસ્લાવિયા, બલ્ગેરિયા, તુર્કી, ઈરાન, અફઘાનિસ્તાન, પાકિસ્તાન થઈને ભારતમાં પ્રવેશતી હતી.