‘મન કે હારે હાર હૈ, મન કે જીતે જીત’

આમ જોવા જઈએ તો ‘ચલ મન જીતવા જઈએ’ ભાગ-૨નું નામ ‘મક્કમ મનોબળ કેળવવાની ચાવી' કરી નાખીએ તો પણ ચાલે

- આર્જવ પારેખ

હાલમાં સિનેમાના પડદે રજૂ થઈ રહેલી ગુજરાતી ફિલ્મો વિશે આપણે વિચારીએ તો એ વધુ મોડર્ન દેખાય છે, ક્યાંક નવા નવા પ્રયોગો કરતી દેખાય છે, એનિમેશન હોય કે મ્યુઝિક, એ ધીમે ધીમે ગ્લોબલ બનતી દેખાય છે. ફિલ્મોની સંખ્યામાં પણ ખૂબ વધારો થતો જોવા મળ્યો છે. ગુજરાતી સિનેમા ક્ષેત્રે થઈ રહેલા પ્રયોગોમાં ફિલ્મ ‘ચલ મન જીતવા જઈએ’ને પણ એક પ્રયોગ જ ગણવો રહ્યો. ચારે બાજુ રોમાન્સ, એક્શન, સસ્પેન્સ અને થ્રીલના જમાનામાં એક એવી ફિલ્મ બને કે જેમાં ન કોઈ ગીત હોય, ન કોઈ રહસ્ય હોય, ન કોઈ પ્રખર વાર્તા હોય એ અજુગતું લાગે. આખી ફિલ્મનું શૂટિંગ માત્ર એક ફાર્મહાઉસમાં થયું હોય અને આખી ફિલ્મના નેવું ટકા સંવાદો એ ફાર્મહાઉસના દરવાજાની અંદર શૂટ થયા હોય એ અનોખી કહી શકાય તેવી ઘટના છે. માત્ર મોટિવેશનના ડોઝ, નીતિમત્તાની વાતો, પેરેન્ટિંગ, બિઝનેસ એથિક્સ, આત્મવિશ્વાસ, ધીરજની આજુબાજુ જ આ ફિલ્મના સંવાદો ગૂંથાયેલા છે. જેમણે પહેલો ભાગ જોયો હતો એવા મોટા ભાગના દર્શકો આ ફિલ્મના બીજા ભાગની કાગડોળે રાહ જોતા હતા. પાંચેક વર્ષ પછી બીજો ભાગ આવ્યો છે, તેને બોક્સ ઓફિસ પર સારો પ્રતિસાદ મળ્યો છે. આ ફિલ્મે અત્યાર સુધીમાં અઢી કરોડની કમાણી કરી લીધી છે.