ફેશનની દુનિયામાં આવી નવી ક્રાંતિ, ડિઝાઇનર સાડીએ લીધું પરંપરાગત સાડીનું સ્થાન

આજની સન્નારીઓ રેડી ટુ વૅર સાડી પહેરવાનું વધારે પસંદ કરે છે. સાડી ડ્રેપિંગ પણ એક કળા બની ગઈ છે. સાડીને મૉડર્ન લૂક આપવા માટે મૉડર્ન બ્લાઉઝનો ટ્રેન્ડ શરૂ થયો છે, જે સિમ્પલ સાડીમાં પણ ગ્લેમર એડ કરી દે છે.

જિજ્ઞાસા સોલંકી

ઑસ્કર ફિલ્મ વિનિંગ ‘આરઆરઆર' ના અતિ લોકપ્રિય ગીત ‘નાટુ નાટુ’ પર મહિલાઓએ સામૂહિક ડાન્સ કર્યો. હા, તો એમાં શું નવી વાત થઈ? વેલ, નવી વાત એ થઈ કે લંડનની ડાઉનિંગ સ્ટ્રીટ પર ભારતીય પરંપરાગત સાડીઓ પહેરીને એકત્રિત થયેલી મૂળ ભારતીય સ્ત્રીઓએ માત્ર ઇંગ્લેન્ડનું નહીં, પરંતુ સમગ્ર વિશ્વનું ધ્યાન ખેંચ્યું. ત્યાંના સ્થાનિક નાગરિકો તો આ દ્રશ્ય જોઈને જ અભિભૂત થઈ ગયા. લંડનમાં સાડી પહેરેલી મહિલા બહુ ઓછી જોવા મળે અને આ તો ૭૦૦ મહિલાઓનો વિરાટ વૃંદ, તે પણ નૃત્ય કરતી મહિલાઓ. આથી સોશિયલ મીડિયામાં આ ડાન્સના વીડિયોઝ ખૂબ વાયરલ થઈ રહ્યા છે. વાત ખરેખર એમ છે કે નેશનલ હેન્ડલૂમ ડે નિમિત્તે પરંપરાગત સાડીઓમાં સજ્જ ૭૦૦ ભારતીય મૂળની મહિલાઓએ લંડનમાં સાડી વોકાથોનમાં ભાગ લીધો હતો. આ કાર્યક્રમનું આયોજન ‘બ્રિટિશ વુમન ઇન સાડી' નામના બિન-લાભકારી જૂથ દ્વારા કરવામાં આવ્યું હતું અને તેમાં વિવિધ રાજ્યોની મહિલાઓને તેમની સંબંધિત પરંપરાગત સાડીઓ પહેરતી જોવા મળી હતી.

કંઈક આવું જ દ્રશ્ય એપ્રિલ મહિનાની શરૂઆતમાં સુરતમાં પણ જોવા મળ્યું હતું. ગુજરાત, મહારાષ્ટ્ર, હરિયાણા, બિહાર, પશ્ચિમ બંગાળ, ઉત્તર પ્રદેશ, મધ્યપ્રદેશ, ઓડિશા જેવાં ૧૬ રાજ્યોની ૧૫ હજાર મહિલાઓ જે-તે રાજ્યને રિપ્રેઝન્ટ કરતી સાડીઓમાં ઉપસ્થિત થઈ હતી. ટેક્સટાઇલ ઉદ્યોગને પ્રોત્સાહિત કરવા માટે ‘સુરત સાડી વોકાથોન'નું આયોજન થયું હતું.