વિઝા વિમર્શ,

યુએસએ વિઝા વિન્ડો (૨)

- ડો.સુધીર શાહ

બારીમાંથી આપણે જેમ બહારનું દૃશ્ય જોઈ શકીએ છીએ એ મુજબ જ ‘યુએસએ વિઝા વિન્ડો’ આ લેખ દ્વારા ‘અભિયાન’ના વાચકોને અમેરિકાના જુદા-જુદા પ્રકારના ઇમિગ્રન્ટ તેમ જ નોન-ઇમિગ્રન્ટ વિઝા વિશે જાણકારી મળી રહી છે.

અમેરિકાની સરકાર દર વર્ષે પંચાવન હજાર ગ્રીનકાર્ડ વિઝા લોટરી દ્વારા આપે છે. વિઝા લોટરીમાં ઇમિગ્રન્ટ વિઝાના અરજદારોએ પોતાનું નામ, ઉંમર, સરનામું અને અન્ય વિગતો આપીને જે ફોર્મ ભરીને સુપરત કર્યું હોય એ જો ખેંચાઈ આવે તો એ વ્યક્તિને ઇમિગ્રન્ટ વિઝા આપવામાં આવે છે. આ ફોર્મ સહેલાઈથી ભરી શકાય છે. એ દાખલ કરવા માટે કોઈ ફી નથી.

બધા જ દેશના લોકો વિઝા લોટરીમાં ભાગ લઈ નથી શકતા. જે દેશમાંથી છેલ્લાં બે વર્ષમાં સૌથી વધુ સંખ્યામાં એ દેશના નાગરિકોએ અમેરિકામાં સ્થળાંતર કર્યું હોય, ત્યાંના ગ્રીનકાર્ડ મેળવ્યા હોય એ દેશના લોકોને વિઝા લોટરીમાં ભાગ લેવાની મનાઈ છે, પણ જો તમારો જન્મ એવા દેશમાં થયો હોય જે દેશના નાગરિકો વિઝા લોટરીમાં ભાગ લઈ શકે એમ હોય અથવા તમારા લગ્ન એવા દેશની વ્યક્તિ જોડે થયા હોય, જે દેશના નાગરિકો વિઝા લોટરીમાં ભાગ લઈ શકે, તો તમે ‘જન્મ’ યા ‘લગ્ન’ના આધારે વિઝા લોટરીમાં ભાગ લઈ શકો છો.

તમારી અરજી વિઝા લોટરીમાં ખેંચાઈ આવે એટલે તમને ગ્રીનકાર્ડ મળશે જ એવું નથી. સૌપ્રથમ તમારી અરજી વિઝા લોટરીમાં ખેંચાઈ આવવી જોઈએ. ત્યાર બાદ તમારે એ દેખાડી આપવાનું રહે છે કે તમે ગુનેગાર નથી, ચેપી રોગ ધરાવતા નથી, વગેરે વગેરે. એકંદરે વિઝા લોટરીમાં ભાગ લઈ શકાય એમ હોય તો આ અમેરિકાનું ગ્રીનકાર્ડ પ્રાપ્ત કરવાનો બહુ સરળ માર્ગ છે.