એક સમયનો પેશન્ટ, હવે બનશે ડૉક્ટર!

કરોડરજ્જુની વિકૃતિનો ઝાયડસ હૉસ્પિટલ ખાતે ઈલાજ કરાવ્યા બાદ યુવકને મળ્યું જીવનનું ધ્યેય.

કરોડરજ્જુની વ્યાધિથી પીડાતા જે કિશોરનો મેં ઈલાજ કર્યો એ જ કિશોર હવે પોતે બીજા દર્દીઓની એવી ખોડખાંપણની સારવાર કરવા મેડિકલ કૉલેજમાં અભ્યાસ કરી રહ્યો છે એ મારી સફળતાનું ઉજ્જ્વળ પ્રતીક છે.

                      - ડૉ. હિતેશ મોદી (સ્પાઇન સર્જન)

દરેક અંધારી રાત્રિના અંતે અજવાળું હોય છે એવું આપણે ઘણી વાર સાંભળતા આવ્યા છીએ અને એવું જ કંઈક બન્યું હતું અમદાવાદના એક કિશોર-આનંદ સાથે. શહેરની જાણીતી ઝાયડસ હૉસ્પિટલના વરિષ્ઠ સ્પાઈન સર્જન ડૉ. હિતેશ મોદીને જ્યારે એમની કારકિર્દીના રસપ્રદ કે પ્રેરણાદાયી કેસ વિશે પૂછવામાં આવ્યું ત્યારે એમણે એમના એક કિશોરવયના દર્દી આનંદના કેસ વિશે ખૂબ ઉત્સાહપૂર્વક વાત કરી.