ઉલ્કાપિંડના ખતરા સામે રામબાણ ઈલાજ

પૃથ્વીના ગોળા પર ધસી આવતા ઉલ્કાપિંડ અથવા તો બીજા અવકાશી પદાર્થોને અધવચ્ચે આંતરીને અને તોડી પાડવાની ટેક્નોલાજી હવે અમેરિકાએ હસ્તગત કરી છે. જાણો, એ અમેરિકી મિશન વિશે.

- નિતુલ ગજ્જર

ગયા નવેમ્બરમાં અમેરિકાની અવકાશવિજ્ઞાન સંસ્થા નાસાએ એક ઉપગ્રહ અવકાશમાં ચડાવ્યો હતો. નાસા જેવી ગંજાવર સ્પેસ એજન્સી કોઈ ઉપગ્રહ અવકાશમાં મોકલે એ નવાઈની વાત નથી. તેમ છતાં હમણાં, થોડા દિવસ પહેલાં એ ઉપગ્રહ અવકાશમાં એક ચોક્કસ સ્થળે પહોંચ્યો એટલે નાસાના વિજ્ઞાનીઓમાં ખુશીની લહેર પ્રસરી ગઈ, કારણ કે એ ઉપગ્રહ એમના એક મિશન માટેનું અમોઘ શસ્ત્ર હતું.

એવું તે શું ખાસ હતું અમેરિકાના સ્પેસ મિશનમાં? અને શા માટે આ મિશન આટલું મહત્ત્વપૂર્ણ હતું?

૨૬ સપ્ટેમ્બર, સાંજે ૭:૨૪નો સમય. આપણે ત્યાં નવલાં નોરતાંના આરંભ માટે લોકો થનગનતા હતા એ ક્ષણ.

અવકાશમાં ચંદ્ર તરફથી એક ઉલ્કાપિંડ પૃથ્વી તરફ વધી રહ્યો છે. એનું વજન સેંકડો ટનમાં અને એની ઝડપ કેટલાક લાખ કિલોમીટર પ્રતિ કલાક છે.

જરા વિચારી જુઓ, આ ઉલ્કાપિંડ પૃથ્વીના ગોળા સાથે ભટકાય તો શું થાય? જો કે આશરે દોઢસો મીટર વ્યાસનો આ ઉપગ્રહ પૃથ્વી નજીક આવે એ પહેલાં રસ્તામાં જ એક ઉપગ્રહ એની સાથે ટકરાય છે અને એની અસરથી જોતજોતાંમાં એ વિશાળ ઉલ્કાપિંડ નાના ટુકડામાં ફેરવાઈ જાય છે.

દેખીતી રીતે કાલ્પનિક લાગતી આ ઘટના તાજેતરમાં જ આકાર પામી છે. અહીં જે ઉપગ્રહની વાત છે એ ગયા વર્ષે નાસાએ પોતાના અતિ મહત્ત્વપૂર્ણ ડાર્ટ (DART-Double Asteroid Redirection Test) મિશન માટે લૉન્ચ કર્યો હતો. નાસાનું આ ડાર્ટ મિશન ખાસ પૃથ્વી તરફ આવતા ઉલ્કાપિંડને તોડી પાડવા માટે તૈયાર કરવામાં આવ્યું છે. ૨૬ સપ્ટેમ્બર, ૨૦૨૨ની સાંજે ૭:૨૪એ નાસાની આ ડાર્ટ ટેક્નોલૉજીએ પોતાની કમાલ દેખાડી દીધી અને પૃથ્વી તરફ આવતા એક ગંજાવર ઉલ્કાપિંડને અવકાશમાં જ તોડી પાડ્યો. આ ઘટના અવકાશમાં બની હોવા છતાં એણે પૃથ્વી પર ઈતિહાસ રચ્યો.

ભ્રમણકક્ષા છોડીને પૃથ્વી તરફ આવી રહેલા ઉલ્કાપિંડ ‘ડિમોરફોર્સ’ને ‘હાર્ટ ટેક્નોલૉજીથી તોડી પાડવામાં આવ્યો, એના વિશેષ કૅમેરાથી ફોટોગ્રાફ અને વિડિયો પણ લેવામાં આવ્યા.