પુરુષ જેવા બનવા તમે રડવાનું ભૂલી ગયાં છો?

ઈમોશનલ સ્ટ્રેસથી હૃદય ભારે થઈ જાય ત્યારે દુઃખ ઠાલવતાં શીખો.

- ડૉ. મિતાલી સમોવા

કોઈ ને કોઈ હૉસ્પિટલનાઑપરેશન થિયેટરની બહાર તમે પણ કદાચ આવું કંઈક લખેલું વાંચ્યું હશેઃ સમય હતો ત્યારે મિત્રો આગળ હૃદય ઠાલવી દીધું હોત તો અહીં હૃદય ચીરવાનો વખત ન આવત.

ભૂતપૂર્વ મિસ યુનિવર્સ અને પોતાના વર્કઆઉટ વિડિયો, આરોગ્યપ્રદ જીવનશૈલી તથા ઝિંદાદિલી માટે જાણીતી અભિનેત્રી સુસ્મિતા સેનને હમણાં હાર્ટ અટેક આવ્યો. એન્જિયોપ્લાસ્ટી દ્વારા સ્ટેન્ટ બેસાડી એણે હાલ પૂરતો તો ખતરો ટાળ્યો છે. સુસ્મિતાએ પોતે જ એના હાર્ટ અટેકની વાત છતી કરી ત્યારે સિદ્ધાર્થ શુક્લા અને કેકે જેવા સક્રિય જીવન જીવતા યુવાનો કે બહુ બહુ તો પચાસની ઉંમર આસપાસ પહોંચેલા લોકોમાં (અને એમાં હવે તો સ્ત્રી પણ ખરી) છેલ્લા થોડા સમય દરમિયાન વધેલા હૃદયરોગના પ્રમાણ તરફ ધ્યાન દોરવાની જરૂરત ઊભી થઈ.

બ્લડ પ્રેશર, ડાયાબિટીસ, સ્થૂળતા જેવા શારીરિક પ્રશ્નો, વારસાગત કારણો, આરામદાયક લાઈફસ્ટાઈલ, પચવામાં ભારે એવા ખોરાકની કુટેવ, તમાકુનાં વ્યસન જેવાં કારણ હૃદયરોગ નોતરે છે એ હવે આપણામાંથી ઘણા જાણે છે. જો કે યુવાનોમાં આવાં કારણોની ગેરહાજરી હોવા છતાં કાર્ડિયાક અરેસ્ટ (હૃદય કામ કરતું જ બંધ થઈ જાય એ અવસ્થા) કે માયો કાર્ડિયલ ઈન્ફાર્ક્શન કે (હૃદયરોગનો હુમલો) થવા જવાબદાર વિલનનું નામ છેઃ સ્ટ્રેસ! લાંબા સમયથી એકધારો-સતત રહેલો ઈમોશનલ સ્ટ્રેસ, જે તરફ મોટા ભાગના લોકોનું ધ્યાન જતું નથી.