જપાનના પહેલા ગુરુમંદિરમાં બિરાજશે આ જૈનાચાર્ય

સત્ય-અહિંસાના સિદ્ધાંત હવે જપાનના અનેક બૌદ્ધધર્મીઓને આકર્ષી રહ્યા છે. જૈન ધર્મનું પાલન કરતાં કરતાં ઘણા જપાનીઓ શુદ્ધ શાકાહારી બની ગયા છે, નવકાર મંત્ર બોલે છે, ખુલ્લા પગે ચાલે છે અને ચૌવિહારનો નિયમ સુદ્ધાં પાળે છે.

- અરવિંદ ગોંડલિયા (સુરત)

એમનું મૂળ નામ ચુરૂશી મિયાઝાવા. વતન જપાન. ધર્મ બૌદ્ધ. એમનું અત્યારનું નામ તુલસી. કામ પોતાના વતન જપાનમાં જૈન ધર્મનો પ્રસાર કરવાનું અને એ રીતે લોકોને સત્ય, અહિંસા અને અપરિગ્રહ જેવા સિદ્ધાંતો તરફ વાળવાનું.

હિટાચી, હોન્ડા, ટોયોટા, સોની, મિત્સુબિશી, યામાહા.. આ બધી કંપની ગ્રાહકોના એના પરના ટકોરબદ્ધ ભરોસા માટે જાણીતી છે. આ તમામ કંપની જપાનની છે! આખી દુનિયા એમની બનાવેલી ચીજવસ્તુ પર આંખ મીંચીને વિશ્વાસ મૂકે છે. એવા જ વિશ્વાસુ છે જપાનના લોકો. ધર્મ પ્રત્યેની એમની શ્રદ્ધા પણ એમણે બનાવેલી ચીજવસ્તુ જેવી જ છેઃ એકદમ મજબૂત અને ટકોરબદ્ધ.

એવા આ જપાનના લોકોનું એક જૂથ હમણાં ગુજરાત આવ્યું. એમનો ઉદ્દેશ હતોઃ બનાસકાંઠા જિલ્લાના નેનાવા ગામમાંથી પુણ્ય સમ્રાટ તરીકે ઓળખાતા જૈનાચાર્ય જયંતસેનસૂરીશ્વરજીની ગુરુમૂર્તિ જપાન લઈ જવાનો. ચિત્રલેખાનો આ અંક તમારા હાથમાં હશે ત્યારે તો આ મૂર્તિ જપાન પહોંચી પણ ગઈ હશે. એ પછી જપાનના નાગાનૌકેન શહેરને એક ગુરુમંદિરમાં એની વિધિવત્ સ્થાપના કરવામાં આવશે.

વાજતે-ગાજતે બનાસકાંઠાના નેનાવા ગામમાંથી નીકળી જૈનાચાર્ય જયંતસેનસૂરીશ્વરજીની ગુરુમૂર્તિની શોભાયાત્રા.

જપાનમાં અત્યારેય ત્રણ જિનાલય છે. એમ છતાં શિન્ટો અને બૌદ્ધ ધર્મ પાળનારા લોકોની બહુમતી ધરાવતા જપાનમાં કોઈ જૈનાચાર્યની મૂર્તિની પ્રાણપ્રતિષ્ઠા થાય એની ઘણાને નવાઈ લાગે. કેમ જપાનના લોકો જૈન ધર્મથી પ્રભાવિત થયા અને શા માટે એક જૈનાચાર્યની પ્રતિમા એમના વતનમાં લઈ જઈ રહ્યા છે એ જિજ્ઞાસા વાજબી છે. ચાલો, એ જિજ્ઞાસાનું નિવારણ કરીએ..

સુરત ત્રિસ્તુતિક જૈન સંઘના ભૂતપૂર્વ ટ્રસ્ટી અને જૈન અગ્રણી અમૃતભાઈ વોહેરા ચિત્રલેખાને કહે છેઃ ‘જપાનથી જૈન વિચારધારા ધરાવતું ૧૨ સભ્યોનું એક ગ્રુપ હમણાં ગુજરાતમાં હતું. એમણે મોહનખેડા, કુંભારિયાજી, તારંગા, જીરાવલા, શંખેશ્વર, પાટણ અને ભાંડવપુર તીર્થ સહિત ગુજરાતનાં વિવિધ જૈન સ્થાનકોની યાત્રા કરી અને દિલ્હી પણ જઈ આવ્યા. આ ગ્રુપમાં આદીશ અને નેમિશ નામે બે બાલશ્રાવકો પણ હતા. જપાનનો સંઘ એ પછી જૈનાચાર્ય જયંતસેન મહારાજની જન્મભૂમિ પેપરાલ અને નેનાવા (બન્ને બનાસકાંઠા) ગયો અને ત્યાંથી મૂર્તિ લઈ રવાના થયો.’