ગુજરાત ભાજપની ગડમથલરૂપાલા વિવાદમાં મોદી ભણી છે મીટ...

રાજકોટમાં પુરુષોત્તમ રૂપાલાના નિવેદનને લઈને જામેલા રૂપાલા વિરુદ્ધ રાજપૂતોના જંગ વચ્ચે પક્ષના બીજા કેટલાક ઉમેદવારો સામે પણ ઠેર ઠેર પ્રસરેલા અસંતોષ પછી ગુજરાત ભાજપ શા માટે ચાતક નજરે રાહ જોઈ રહ્યો છે નરેન્દ્ર મોદીની?

- કેતન ત્રિવેદી (અમદાવાદ)

એ ને મોવડીમંડળનો (અતિ) આત્મવિશ્વાસ ગણવો કે પક્ષમાં કોંગ્રેસીકરણની શરૂઆત ગણવી એ નક્કી કરવું અઘરું છે, પણ ગુજરાતમાં ભારતીય જનતા પાર્ટીના ઉમેદવારોની પસંદગીને લઈને જે ઘમાસાણ મચ્યું છે એનાથી પક્ષની આબરૂના સરાજાહેર ધજાગરા ઊડી ચૂક્યા છે.

હમણાં સુધી ચૂંટણીમાં ઉમેદવારોની પસંદગી વખતે આંતરિક વિરોધ થાય, પ્રદેશ કાર્યાલય પર તોડફોડ થાય, ક્યારેક અલગ અલગ દાવેદારતરફી કાર્યકરો વચ્ચે હાથાપાયી થાય અને સુરક્ષાકર્મીઓ ગોઠવવા પડે એ બધું કોંગ્રેસ માટે સ્વાભાવિક ગણાતું હતું. આ વખતે ગંગા ઊલટી વહી છે. કોંગ્રેસને બદલે ભાજપમાં સાબરકાંઠા, વડોદરા, સુરેન્દ્રનગર જેવી બેઠકોમાં પક્ષના કાર્યકરો શિસ્તની સીમા ઓળંગીને વિરોધ કરી રહ્યા છે. બીજી અમુક બેઠકોમાં પણ બહુ નહીં તો છાનો ગણગણાટ તો છે જ.

ભારતીય જનતા પક્ષની રાજકીય પ્રયોગશાળા ગણાતા ગુજરાતમાં ભાજપ અત્યારે બે સમસ્યા સામે ઝઝૂમી રહ્યો છેઃ પાયાના કાર્યકરોમાં ઝડપથી પ્રસરી રહેલો અસંતોષ અને રાજકોટના ઉમેદવાર પુરુષોત્તમ રૂપાલાના નિવેદનને પગલે ક્ષત્રિય સમાજમાં તીવ્રતાથી ફેલાઈ રહેલો રોષ.

મંગળવાર, બે એપ્રિલની સવારે આ લખાઈ રહ્યું છે ત્યારે ક્ષત્રિય સમાજમાં ભાજપ વિરુદ્ધ ભડકેલી આગને ઠારવા માટે ગાંધીનગરમાં પ્રદેશમોવડીઓ અને ક્ષત્રિય સમાજના અગ્રણીઓ વચ્ચે બેઠક ચાલી રહી છે. એમાં શું નીપજે છે એ પછી ખબર પડશે, પણ સૌથી વધુ આશ્ચર્યની વાત એ છે કે રૂપાલાએ બે વખત આ મુદ્દે માફી માગવા છતાં વિવાદ વકરી કેમ રહ્યો છે? પ્રદેશ ભાજપના કહેવાતા ક્ષત્રિય નેતાઓ આગ ઠારવાના બદલે ચૂપ કેમ બેઠા છે? ગોંડલના જયરાજસિંહ જાડેજાએ સમાજનું સંમેલન બોલાવીને માફીનો તખતો ઊભો કર્યો એ સિવાય ભાજપના પ્રદેશકક્ષાના કોઈ ક્ષત્રિય નેતા આ વિવાદને ઠારવા ખોંખારો ખાઈને બોલ્યા નથી. ક્ષત્રિય સમાજ વતી બોલતાં પદ્મિનીબા હજુ થોડા સમય પહેલાં જ ભાજપમાં જોડાયાં છે, પણ પ્રદેશના કોઈ નેતા એમને અટકાવી શક્યા નથી.

રૂખી સમાજના એક કાર્યક્રમમાં પુરુષોત્તમ રૂપાલાએ આપેલા નિવેદન પછી રાજપૂત સમાજનો વિરોધ શરૂ થયો ત્યારે મોટા ભાગના લોકો આ મામલો ક્ષત્રિય વર્સિસ પટેલ એ દિશા પકડી રહ્યો છે એવું માનતા હતા. રાજકોટ બેઠક પર કડવા પટેલ ઉમેદવારને કારણે લેઉઆ અને કડવા પટેલો વચ્ચે બિનજરૂરી વિવાદ ન થાય અને આ રીતે પટેલો એક થાય તો પણ સ્થિતિ ભાજપના ફાયદામાં જ હતી.