સૌથી મોટું ચિત્ર બન્યું સૌથી નાના પેન્ટિંગ માટેની પ્રેરણા

ચોખા, તલ, લખોટી, માચીસની સળી અને ટાંચણીના મોઢા પર સુદ્ધાં વડોદરાના આ માઈક્રો પેન્ટર કરે છે કારીગરી.

- નિતુલ ગજ્જર (વડોદરા)

૧૯૯૧ની એક સાંજે ટીવી પર વિશ્વના સૌથી મોટા ચિત્રના સમાચાર પ્રસારિત થઈ રહ્યા હતા. એ સાંભળી વડોદરાના એક યુવા ચિત્રકારને વિચાર આવ્યો કે આ રીતનું રેકૉર્ડ બ્રેકિંગ ચિત્ર વડોદરામાં પણ બનાવ્યું હોય તો? વિચાર સારો હતો, પણ એની પાસે જગ્યાનો અભાવ હતો એટલે મોટું ચિત્ર દોરવાનો વિચાર માંડી વાળ્યો અને એની બદલે નાનાં-નાનાં એટલે કે માઈક્રો પેન્ટિંગ તરફ પોતાનું ધ્યાન કેન્દ્રિત કર્યું.

પોતાનાં માઈક્રો પેન્ટિંગને કારણે જાણીતા થયેલા ચિત્રકાર પ્રજેશ શાહની આ વાત છે.

આમ તો ચિત્રકામ માટે ખૂબ ધૈર્ય અને એકાગ્રતા જોઈએ, એમાં પણ બહુ નાનું અથવા તો ઝીણું ચિત્ર દોરવાનું થાય તો ભલભલી વ્યક્તિના હાથ ધ્રૂજવા લાગે. એવા જટિલ અને આંખો દુખાડી દેતા કામને વડોદરાના પ્રજેશ શાહે પોતાનો શોખ બનાવ્યો છે. એવું નથી કે પ્રજેશ શાહ માત્ર આ જ કામ કરે છે, વ્યવસાયે તો એ શિક્ષક છે, પરંતુ નાની ઉંમરથી લાગેલો ચિત્રકામનો છંદ એમણે જાળવી રાખ્યો છે. એમણે પચ્ચીસ બાય પચ્ચીસ મિલિમીટરનું પ્રથમ માઈક્રો પેન્ટિંગ બનાવ્યું પછી એમના ચિત્રનું કદ ઘટતું ગયું અને આજે તો એ નખની જાડાઈ જેટલી ઓછી જગ્યા પર પણ ચિત્ર દોરી શકે છે.