വിശ്വാസം....അതല്ലേ...എല്ലാം ...

ജനങ്ങളെ അന്ധ വിശ്വാസത്തിനെതിരെ ബോധവൽക്കരിക്കുന്നതിന്റെ ഭാഗമായി ഒരു അന്ധവിശ്വാസവിരുദ്ധ പ്രമേയം നമ്മൾ പാസ്സാക്കണമെന്നാണ് എന്റെ അഭിപ്രായം...

- പി.ആർ. കൃഷ്ണൻകുട്ടി

അജണ്ടയിലുള്ള വിഷയങ്ങളെല്ലാം കഴിഞ്ഞു. മറ്റെന്തെങ്കിലും വിഷയം ആർക്കെങ്കിലും ഉന്നയിക്കാനുണ്ടെങ്കിൽ ആവാം.' ഗ്രാമപഞ്ചായത്ത് പ്രസിഡണ്ട് ഗംഗാധരൻ യോഗം അവസാനിപ്പിക്കുന്നതിന് മുമ്പ് ഗ്രാമപഞ്ചായത്തംഗങ്ങളോടായി  പറഞ്ഞു.

"എനിക്ക് കാലിക പ്രസക്തമായ ഒരു വിഷയം അവതരിപ്പിക്കാനുണ്ട്. എട്ടാം വാർഡ് മെമ്പറും അനാചാരങ്ങൾക്കെതിരെ ശക്തിയായി പടപൊരുതുന്ന യുവനേതാവുമായ ഗിരീഷ് മാസ്റ്റർ എഴുന്നേറ്റ് നിന്നു പറഞ്ഞു.

“മാഷ് പറഞ്ഞാളൂ.' പ്രസിഡണ്ട് അനുമതി നൽകി

നമ്മുടെ സംസ്ഥാനത്ത് നടന്ന നരബലികളും... മറ്റൊരിടത്ത് ബാധയൊഴിപ്പിക്കലിന്റെ പേരിൽ നടന്ന കൊടുംക്രൂരത കളും മറ്റും നമ്മളെല്ലാം കണ്ടതാണല്ലോ.. .. അതിനാൽ ജനങ്ങളെ അന്ധ വിശ്വാസത്തിനെതിരെ ബോധവൽക്കരിക്കുന്നതിന്റെ ഭാഗമായി ഒരു അന്ധവിശ്വാസവിരുദ്ധ പ്രമേയം നമ്മൾ പാസ്സാക്കണമെന്നാണ് എന്റെ അഭിപ്രായം...

"അത് വളരെ നല്ല കാര്യമാണല്ലോ.. മാഷേ..പ്രസിഡണ്ട് പറഞ്ഞു.

“എന്താ... ആർക്കെങ്കിലും മാഷിന്റെ ഈഅഭിപ്രായത്തോട് വിരോധമുണ്ടോ ? “ഇങ്ങിനെ ഒരു പ്രമേയം കൊണ്ട് ഈ നാട്ടിലെ ജനങ്ങളിൽ ഒരു മാറ്റവും ഉണ്ടാക്കാൻ കഴിയില്ല... അങ്ങിനെ ഒരു പ്രമേയാവതരണം വന്നാൽ ഞങ്ങൾ വിട്ടുനിൽക്കും.പ്രതിപക്ഷ നേതാവ് പറഞ്ഞു.

"പ്രമേയം ഞാൻ തയ്യാറാക്കി കഴിഞ്ഞു. വരുന്ന പതിനാലാം തീയതി ഞാനത് അവതരിപ്പിക്കുകയും ചെയ്യും ഗിരീഷ് മാസ്റ്റർ പ്രതിപക്ഷ നേതാവിനെ നോക്കി ഉറച്ച ശബ്ദത്തിൽ വെല്ലുവിളിച്ചു കൊണ്ട് പറഞ്ഞു . തീയതി കേട്ട പാടെ പ്രസിഡണ്ട് കലണ്ടറിൽ കണ്ണോടിച്ചിട്ട് പറഞ്ഞു "ഗിരീഷ് മാഷേ... ചൊവ്വാഴ്ച പ്രമേയം അവതരിപ്പിക്കണ്ട... ചൊവ്വാഴ്ച ഒരു ശുഭകാര്യത്തിനും നന്നല്ല...