അയ്യാ വൈകുണ്ഠ സ്വാമികൾ കേരളീയ നവോത്ഥാനത്തിന്റെ വഴികാട്ടി

തിരുവിതാംകൂർ രാജഭരണത്തെയും ബ്രിട്ടീഷ് ഭരണത്തെയും ഒരുപോലെ എതിർത്ത നവോത്ഥാന നായകനാണ് വൈകുണ്ഠ സ്വാമികൾ

കേരളത്തിലെ ആദ്യ സാമൂഹിക  സംഘടനയായ സമത്വസമാജത്തിന്റെ സ്ഥാപകനാണ് അയ്യാ വൈകുണ്ഠ സ്വാമികൾ. കേരളീയ നവോത്ഥാനത്തിന്റെ വഴികാട്ടി' എന്നും അദ്ദേഹം വിശേഷിപ്പിക്കപ്പെടുന്നു.

നാഗർകോവിലിനടുത്ത് ശാസ്താംകോയിലിൽ (സ്വാമിതോപ്) 1809 മാർച്ച് 12-ന് ജനനം. കിരീടം വെച്ച രാജാവ് എന്ന അർഥത്തിൽ 'മുടിചൂടും പെരുമാൾ' എന്നാണ് മാതാപിതാക്കൾ നൽകിയപേര്. സവർണ പ്രമാണിമാരുടെ എതിർപ്പു മൂലം പേര് മുത്തുക്കുട്ടി എന്ന് മാറ്റേണ്ടിവന്നു.

വൈഷ്ണവ പാരമ്പര്യമുള്ള നാടാർ കുടുംബമായിരുന്നു മുത്തുക്കുട്ടിയുടേത്. ജാതിയുടെ പേരിലുള്ള വിവേചനങ്ങളും അടിമത്തസമാനമായ ജീവിതവും ഒരു പ്രക്ഷോഭകാരിയാക്കി മാറ്റി. വിഷ്ണുവിന്റെ അവതാരമാണ് താനെന്ന് സ്വയം പ്രഖ്യാപിച്ച അദ്ദേഹം വൈകുണ്ഠർ എന്നപേരു സ്വീകരിച്ചു.

 "വേലചെയ്താൽ കൂലികിട്ടണം എന്ന മുദ്രാവാക്യമുയർത്തിക്കൊണ്ടാണ് അക്കാലത്ത് നിലനിന്നിരുന്ന പ്രതിഫലമില്ലാത്ത നിർബന്ധിത വേല (ഊഴിയം) യെതിരേ വൈകുണ്ഠ സ്വാമി പ്രക്ഷോഭം നയിച്ചത്. 1836-ൽ ശുചീന്ദ്രത്ത് സ്ഥാപിച്ച സമത്വസമാജം ഇന്ത്യയിലെ തന്നെ ആദ്യകാല നവോത്ഥാനപ്രസ്ഥാനങ്ങളിലൊന്നാണ്. ജാതീയമായ വേർതിരിവുകൾ ഇല്ലായ്മചെയ്യാൻ എല്ലാ ജാതിക്കാരെയും ഒരുമിച്ചിരുത്തി ഭക്ഷണം കഴിക്കുന്ന സഹപന്തിഭോജനവും അദ്ദേഹം ആരംഭിച്ചു.