ആശാൻ കവിതകളുടെ 100 വർഷം

ആധുനിക മലയാള കവിത്രയത്തിലൊരാളായ കുമാരനാശാന്റെ പ്രധാന കൃതികളാണ് ദുരവസ്ഥയും ചണ്ഡാലഭിക്ഷുകിയും. രണ്ട് കൃതികളുടെയും നൂറാം വാർഷികം 2022-ൽ ആഘോഷിക്കുകയാണ്. ഈ പശ്ചാത്തലത്തിൽ കുമാരനാശാന്റെ ജീവിതത്തെയും കൃതികളെയും വിലയിരുത്തുന്നു

- നീതു കെ.ആർ.

ആധുനിക കവിത്രയത്തിൽ ആശയഗാംഭീര്യത്തോടെ തിളങ്ങിനിന്ന യുഗസ്രഷ്ടാവാണ് കുമാരനാശാൻ. വിപ്ലവത്തിന്റെ ശുക നക്ഷത്രമെന്ന ജോസഫ് മുണ്ടശ്ശേരിയുടെ വിശേഷണം അന്വർഥമാക്കുന്നതായിരുന്നു ആശാന്റെ കാവ്യജീവിതം. മഹാകാവ്യമെഴുതാതെ മഹാകവിയായ ആശാനെ അത്തരമൊരു പദവി നൽകി മദ്രാസ് യൂണിവേഴ്സിറ്റി പിന്നീട് ആദരിച്ചു.

മലയാളകവിതയുടെ കാല്പനികവസന്തത്തിന് തുടക്കം കുറിച്ച് കുമാരനാശാൻ കാളിയമ്മ-നാരായണൻ ദമ്പതിമാരുടെ മകനായി ചിറയിൻകീഴ് താലൂക്കിൽപ്പെട്ട കായിക്കര ഗ്രാമത്തിലെ തൊമ്മൻവിളാകം വീട്ടിൽ, 1873 ഏപ്രിൽ 12-ന് ജനിച്ചു. നെടുങ്ങണ്ടയിലെ കുടിപ്പള്ളിക്കൂടത്തിൽ നിന്നായിരുന്നു വിദ്യാഭ്യാസമാരംഭിച്ചത്. തുണ്ടത്തിൽ പെരുമാളാശാനായിരുന്നു കുമാരന്റെ പ്രഥമഗുരു. സംസ്കൃതപണ്ഡിതനായ മണമ്പൂർ ഗോവിന്ദനാശാന്റെ വിജ്ഞാനസന്ദായിനി' എന്ന പാഠശാലയിലായിരുന്നു തുടർപഠനം. പാട്ടുകളും ശ്ലോകങ്ങളുമെഴുതുന്ന കാര്യത്തിൽ കുമാരു അക്കാലത്തു തന്നെ പ്രതിഭ തെളിയിച്ചു.

1891-ൽ ശ്രീനാരായണ ഗുരുവിന്റെ ശിഷ്യത്വം സ്വീകരിച്ചതാണ് ആശാന്റെ ജീവിതത്തിലെ വഴിത്തിരിവായത്. ആധ്യാത്മികതയിലേക്കും സാമുദായിക സേവനത്തിലേക്കും അദ്ദേഹം വഴിമാറി. സംസ്കൃതം, ഇംഗ്ലീഷ് പഠനമുൾപ്പെടെ പലതും ആ കണ്ടുമുട്ടലിലൂടെ സാധിച്ചു. ഡോ. പൽപ്പുവിന്റെ കൂടെ ബെംഗളൂരുവിലും കൽക്കത്തയിലും താമസിച്ച് പഠിച്ചു. ശ്രീകൃഷ്ണനും അർജുനനും തമ്മിലുള്ള ബന്ധത്തോടാണ് ആശാനും ഗുരുവും തമ്മിലുള്ള ബന്ധത്തെ ഉള്ളൂർ ഉപമിക്കുന്നത്.

1898-1900 കാലത്തെ ബംഗാൾ വാസമാണ് ആശാന്റെ കാവ്യങ്ങളിലെ പ്രബുദ്ധതയ്ക്കാധാരം. ബംഗാളി സാഹിത്യത്തിന്റെ നവോത്ഥാനകാലഘട്ടവും രബീന്ദ്രനാഥ ടാഗോറിന്റെയും മറ്റും കൃതികളും ആശാനിലെ കവിയെ വളർത്തി. ശ്രീനാരായണഗുരുവിന്റെ ആജ്ഞാനുസരണം കൊൽക്കത്തയിലെ വിദ്യാഭ്യാസമവസാനിപ്പിച്ച്, കുമാരനാശാൻ അരുവിപ്പുറത്ത് മടങ്ങിയെത്തി. ഇക്കാലത്ത് അദ്ദേഹം മൃത്യുഞ്ജയം, വിചിത്രവിജയം തുടങ്ങിയ നാടകങ്ങളും ശിവസ്തോത്രമാല തുടങ്ങിയ കവിതകളും രചിച്ചു. 1903-ൽ എസ്.എൻ.ഡി.പി. യോഗത്തിന്റെ ആദ്യ ജനറൽ സെക്രട്ടറിയായി. 1909 മുതൽ പതിമ്മൂന്നു വർഷത്തിലേറെ വിവേകോദയം മാസികയുടെ പത്രാധിപരായിരുന്നു. 1913-ൽ ശ്രീമൂലം പ്രജാ സഭാംഗം. 1918-ൽ കെ. ഭാനുമതിയമ്മയെ വിവാഹം ചെയ്തു. 1920-ൽ എസ്.എൻ.ഡി.പി. യോഗം ജനറൽ സെക്രട്ടറി പദമൊഴിഞ്ഞ് നിയമസഭയിൽ അംഗമായി. 1924 ജനുവരി 16-ന് പല്ലനയാറ്റിലുണ്ടായ റെഡീമർ ബോട്ടപകടത്തിൽ അദ്ദേഹം വിടപറഞ്ഞു.