ഇന്ദ്രജാലക്കാരായ ഹോർമോണുകൾ

നമ്മുടെ ശാരീരികവും മാനസികവുമായ ആരോഗ്യത്തെ നിയന്ത്രിക്കുന്നതിൽ ഹോർമോണുകൾ പ്രധാന പങ്കുവഹിക്കുന്നു. ആരോഗ്യമേഖലയിൽ ഇന്ന് ഏറ്റവും ചർച്ചചെയ്യപ്പെടുന്ന ഹോർമോണുകളുടെ പ്രവർത്തനങ്ങളെക്കുറിച്ചും പ്രാധാന്യത്തെക്കുറിച്ചും മനസ്സിലാക്കുന്നത് മെച്ചപ്പെട്ട ജീവിതത്തിന് സഹായകമാകും

- സുസ്മിത ബാബു

ചിലനേരങ്ങളിൽ കാരണമറിയാതുള്ള വിഷാദവും ക്ഷിപ്രകോപവും മറ്റുചിലപ്പോൾ ആഹ്ലാദത്തിന്റെ ആകാശങ്ങളിൽ പക്ഷിയെപ്പോലെ ഉയർന്നു പറക്കലുകളും അനിയന്ത്രിതവും നിയന്ത്രിതവുമായ പ്രതികരണങ്ങളും ഒക്കെക്കൂടി "ഞാനെന്തൊരു ഞാനാ' എന്ന് തോന്നിപ്പോയ ഒട്ടേറെ മുഹൂർത്തങ്ങൾ നമ്മുടെയൊക്കെ ജീവിതത്തിലുണ്ടാവാറില്ലേ! ആരാവും ഇത്തരം സന്ദർഭങ്ങളിൽ നമ്മുടെ കടിഞ്ഞാൺ പിടിച്ചിരിക്കുക എന്ന് സന്ദേഹപ്പെടാറുമില്ലേ? ഒട്ടും അതിജീവിക്കാൻ പറ്റില്ല എന്നു തോന്നിയ പ്രശ്നങ്ങളെ ഒരു പൂവിടരുന്ന മനോഹാരിതയോടെ കൈകാര്യം ചെയ്തവരും, എന്നാൽ, മറികടക്കാൻ എളുപ്പമെന്ന് കരുതിയ ഒരു സാഹചര്യത്തിൽ വൈകാരികമായി ഇടപെട്ട് സങ്കീർണമാക്കിയവരും ഉണ്ടാവും നമ്മളിൽ

 കൂടുതൽ ആലോചിച്ച് തല ചൂടാക്കേണ്ട, ഇതൊക്കെ നമ്മുടെ ശരീരത്തിലെ ഹോർമോണുകളുടെ ചില ഇന്ദ്രജാലങ്ങളാണ്. അന്തഃസ്രാവഗ്രന്ഥികൾ സൃഷ്ടിക്കുന്ന മനുഷ്യസ്വഭാവനിർണയത്തിന്റെ അതിസൂക്ഷ്മകണികകളാണ് ഹോർമോണുകൾ. ഇഷ്ടവും ഇഷ്ടക്കേടും ദേഷ്യവും പ്രണയവും പകയും സങ്കടവും സന്തോഷവും എല്ലാം അവരിലൂടെയാണ് പ്രതിഫലിക്കുന്നത്.

മനുഷ്യന്റെ ശാരീരിക, വൈകാരിക ആരോഗ്യത്ത പ്രതിഫലിപ്പിക്കുന്നത് കൃത്യമായ അനുപാതത്തിൽ ഉത്പാദിപ്പിക്കപ്പെടുന്ന ഹോർമോണുകളാണ്. ശരീരത്തിന്റെ വിവിധ മാറ്റങ്ങളെ നിർണയിക്കുന്നതിലും ഹോർമോണുകൾ വലിയ പങ്കുവഹിക്കുന്നു. വിശപ്പ്, ശരീരഭാരം, ശാരീരിക പ്രക്രിയകൾ, മാനസികാവസ്ഥ എന്നിവ നിയന്ത്രിക്കുന്നതിൽ പ്രധാന പങ്കുവഹിക്കുന്ന സന്ദേശവാഹകരാണിവ.

അസന്തുലിതമായാൽ

 പുരുഷന്മാരും  സ്ത്രീകളും ഒരുപോലെ അഭിമുഖീകരിക്കുന്ന ഒരു പ്രശ്നമാണ് ഹോർമോൺ അസന്തുലിതാവസ്ഥ. ചെറിയ കുട്ടികളടക്കം ധാരാളം പേർ അവരുടെ ജീവിതത്തിൽ ഹോർമോണുകളുമായി ബന്ധപ്പെട്ട പ്രശ്നങ്ങൾ അനുഭവിക്കുന്നു. എന്നാൽ, പലരും ശരീരത്തിൽ ഹോർമോൺ അസന്തുലിതാവസ്ഥ സൂചിപ്പിക്കുന്ന ലക്ഷണങ്ങളെ അവഗണിക്കുകയാണ് സാധാരണ ചെയ്യുന്നത്. ഹോർമോൺ ഉത്പാദനത്തിലുള്ള ഏറ്റക്കുറച്ചിലുകൾ ഗുരുതരമായ ശാരീരികാസ്വസ്ഥതകൾക്ക് കാരണമാവുന്നു.

ഉത്തേജിപ്പിക്കുക എന്നർഥമുള്ള ഓർമാവോ എന്ന ഗ്രീക്ക് പദത്തിൽ നിന്നാണ് ഹോർമോൺ എന്ന വാക്കിന്റെ ഉദ്ഭവം. എന്നാൽ, ഉത്തേജകാരികൾ (excitatory) മാത്രമല്ല ഹോർമോണുകളുടെ കൂട്ടത്തിലുള്ളത്. നിരോധകാരികളും (inhibitory) ഉണ്ട്. അവയവങ്ങളും ശരീരകോശങ്ങളും തമ്മിൽ ആശയവിനിമയം നടത്തുന്നത് ഹോർമോണുകൾ മുഖേനയാണ്.