மருமகளிடம் அத்துமீறல்...கருக்கலைப்பு...-அ.தி.மு.க. நிர்வாகி டார்ச்சர்!

வீட்டுக்கு வந்த இளம் மருமகளிடம் பாலியல் அத்துமீறலிலும், கட்டாயக் கருக்கலைப்பிலும் ஈடுபட்டுக் கொடுமைப்படுத்திய தூத்துக்குடி மாநகரின் அ.தி.மு.க. முன்னணி நிர்வாகி மீது நான்கு பிரிவுகளில் வழக்கு பதிவாகியிருக்கிறது.

- ப.இராம்குமார்

தூத்துக்குடியின் ஸ்டேட் பேங்க் காலனி பகுதியைச் சேர்ந்தவர் பொன்ராஜ். அ.தி.மு.க. முன்னாள் கவுன்சிலர். வடபகுதி பகுதிச் செயலாளர். ஒட்டுமொத்த குடும்ப நபர்கள் மீதும் அந்த கேப்பிட்டல் கிரிமினல் வழக்கு பதிவாகியிருக்கிறது.

பொன்ராஜின் மகன் கவிராமுக்கும் நகரின் சிவந்தாக்குளம் பகுதியைச் சேர்ந்த மணிராஜ் என்பவரின் மகள் திவ்யதர்ஷினிக்கும் கடந்த 10.12.2023 அன்று திருமணமானது. பொன்ராஜின் மகன் ஹோட்டல் வைத்திருப்பவர். ஆசிரியை பயிற்சி முடித்துவிட்டு தனியார் பள்ளியொன்றில் ஆசிரியையாக இருப்பவர் திவ்யதர்ஷினி.

மணிராஜையும் அவரது மகள் திவ்யதர்ஷினியையும் அவர்களின் இல்லத்தில் சந்தித்தபோது தன் மகளுக்கு நேர்ந்த கொடுமையையும், சித்ரவதையையும் தந்தை விவரித்தார்.

"புரோக்கர் ஒருவர் மூலமா பொன்ராஜ் மகன் கவிராமை பற்றித் தெரிந்து, ஜாதகம் பார்த்து திருமணத்தை நடத்தினோம். எங்களுக்கு ஜாதகம் பார்க்கிற பழக்கமெல்லாம் கெடையாது, மனப்பொருத்தத்தை மட்டுமே பார்த்துக்குவோம்னு சொன்னார் பொன்ராஜ். என்னோட ரெண்டு மகள்களையும் 100 பவுன் நகை போட்டு சிறப்பா கல்யாணம் முடிச்சுவைச்சேன் அதமாதிரி என் வீட்டுக்கு வர்ற மருமகளும் அந்தளவுக்கு நகை, ரொக்கத்தோட வரணும்னு சொல்லி அழுத்தினார் பொன்ராஜ். ஒரே பெண் என்பதால் வரதட்சணையாக 80 பவுன் நகை, 10 லட்சம் ரொக்கம், சீர்வரிசையா 7 லட்சம் மதிப்புள்ள பொருட்களைக் கொடுத்தோம்.

திருமணத்திற்குப் பின் தென்காசியிலிருக்கும் தன் சகோதரியின் வீட்டிற்கு மனைவியுடன் சென்ற கவிராம், அங்கு ஓரிரு நாட்களிருந்துவிட்டுத் திரும்பிவந்தனர். அதற்கு இரண்டு நாள் பின்னர்தான் அந்தச் சம்பவம். 10.01.2024 அன்று மாலை கணவர் கவிராமும் அவரது தாய் லீலாவதியும் வெளியே சென்றிருந்த நேரத்தில் இரவு 10.30 மணிக்கு என் மகள் தனது அறையின் படுக்கையில் அயர்ந்து தூங்கிக்கிட்டிருந்தா. அப்ப வீட்டிலிருந்த மாமனார் பொன்ராஜ், திவ்யதர்ஷினி அறைக்குள் நுழைந்தவர் அவளைப் பார்த்து ரசித்ததோடு தன் நிலை பற்றி துளியும் யோசிக் காமல் திவ்யதர்ஷினியிடம் அத்துமீறி சீண்டலில் ஈடுபட்டிருக்கார்.